ސްޓެލްކޯގެ އިތުރު ޓްރާންސްފޯމަރެއް ބަހައްޓަން ބިން ނުދޭން މާލޭ ސިޓީ ކައުންސިލުން ނިންމައިފި
ސްޓެލްކޯގެ އިތުރު ޓްރާންސްފޯމަރެއް ބަހައްޓަން ބިން ނުދޭން މާލޭ ސިޓީ ކައުންސިލުން ނިންމައިފިއެވެ.
ސިޓީ ކައުންސިލުގެ މިއަދުގެ ޖަލްސާގައި މިގޮތަށް ނިންމާފައިވާއިރު، މޭޔަރު ޑރ. މުހައްމަދު މުއިއްޒު ވިދާޅުވީ ވިލިމާލޭގެ ކަރަންޓު ހިދުމަތުގެ ފެންވަރު ރަނގަޅު ކުރުމަށް ޓަަކައިި، ސްޓެލްކޯގެ ބިމާ އިންވެގެން ޓްރާންސްފޯމަރަށް ބޭނުންވާ 30 އަކަފޫޓުގެ ބިމެއް ދިނުމަށް އެދިފައިވާ ކަމަށާއި ބިން ނުދީފިއްޔާ ވިލިނގިލިން ކަރަންޓު ކެނޑުނީ ކައުންސިލުން ބިން ނުދީގެން ކަމަށްބުނެ މައްސަލަތައް ފެންމަތިވެދާނެކަމަށެވެ.
އަދި މި ކަމާއި ގުޅިގެން ކައުންސިލް މެންބަރުންގެ ހިޔާލު ހޯދުމަށް ހުޅުވާލުމުން ބައެއް މެންބަރުން ވަނީ ސްޓެލްކޯއާ މެދުގައި ހިތްހަމަނުޖެހުން ފާޅުކޮށް ބައެއްވާހަކަތައް ދައްކަވާފައެވެ. އެގޮތުން، މެންބަރު ނަހުލާ އަލީ ވިދާޅުވީ ވިލިމާލޭގައި އެހެން ބިންތަކުގައި ވެސް ޓްރާންސްފޯމަރު ބެހެއްޓޭނެ ކަމަށާއި މިހާރު ސްޓެލްކޯއަށް ލިބިފައި އޮތް ބިމުން އަނެއްކާ ޖެހިގެން އޮތް ބިމުން އިތުރު ބައެއް އިތުރުކޮށްލަން އެ ކުންފުނިން އެދޭ އެދުމާމެކު ޝައްކު އުފެދޭކަމަށް ނަހުލާ ވިދާޅުވިއެވެ.
މީގެ އިތުރުން، ގަލޮޅު އުތުރު ދާއިރާގެ ކައުންސިލް މެންބަރު ސައިފް ފާތިހު ވިދާޅުވީ މީގެ ކުރިން ޓްރާންސްފޯމަރު ބަހައްޓަން ދިން ބިންތައް ސްޓެލްކޯއިން ބޭނުންކޮށްފައިވާ ގޮތް ވެސް ބަލަން ޖެހޭ ކަމަށާއި، ސިޓީ ކައުންސިލުން މަދު ލާރިކޮޅަކަށް އަކަފޫޓަކަށް ދިނީމާ އެ ތަންތަނުން އާމްދަނީ ހޯދަމުން އެ ދަނީ ސްޓެލްކޯއިންކަމަށާއި ސްޓެލްކޯގެ ބައެއް ބިންތަކުގައި ލެޑް ޕެނަލްވެސް ހަރުކޮށްފައިވާކަމަށެވެ. އަދި މާލީ މަންފާ ހޯދުމަށް ސްޓެލްކޯއިން އެ ތަންތަން ބޭނުންކުރާ ނަމަ ސިޓީ ކައުންސިލުން އެކަން ހުއްޓުވަން ޖެހޭނެ ކަމަށްވެސް ސައިފު ވިދާޅުވިއެވެ.
މިއަދު އެ ކައުންސިލުން ފާސްކުރީ މިހާރު އިންޖީނުގެ ހިންގަމުން އަންނަ ބިމުގައި ޓްރާންސްފޯމަރު ބެހެއްޓުމަށް އެންގުމަށާއި އެ ތަނުގައި ނުބެހެއްޓޭނަމަ އިތުރަށް މަޝްވަރާ ކުރުމަށެވެ. އަދި، ސްޓްލެކޯއިން ކުރިއަށް އޮތް ތިން އަހަރަށް ބޭނުންވާ ޖާގައިގެ ޕްލޭނެއް ހޯދުމަށް ވެސް ކައުންސިލުންވަނީ ނިންމާފައެވެ.
ގައުމުގެ އަސާސީ ޚިދްމަތްތަކަށް ބުރޫ އަރުވަން ތިޔައީ ކޮންބަޔެއް ހެއްޔެވެ؟ ފަސްއަހަރު ވާއިރަށް ގެޔަށް ދާންޖެހޭ ބަޔަކު މުޅި ގައުމަށް ބޭނުންވާ ޚިދްމަތްތަކަށް ހުރަހެއް ނޭޅޭނެއެވެ. ވެރިކަމަށް ޖެއްސުން ކުރިޔަސް ތިޔައީއަކީ ވަގުތީ ބަޔަކަށް ހުއްޓުވިގެންނުވާނެ ކަންތަކެވެ.