ޗައިނާއަށް ބާރުގަދަ ބިންހެލުމެއް އައިސް 21 މީހަކު ޒަޚަމުވެއްޖެ
ޗައިނާގެ އިރުމަތީގައިވާ ޝަންދޮންގ ޕުރޮވިންސަށް ރިކްޓަރ މިންގަނޑުން 5.4ގެ ބާރުގަދަ ބިންހެލުމެއްގައި އައިސް 21 މީހަކު ޒަޚަމުވެ، ބޮޑެތި ގެއްލުންތަކެއް ލިބިއްޖެއެވެ. މި ބިންހެލުން އައިސްފައި ވަނީ ޝަންދޮންގ ޕުރޮވިންސުގެ ޑޭޜޫއަށެވެ.
ބިންހެލުން އައިސްފައި ވަނީ ދަންވަރުގެ ވަގުތުގައި ކަމަށް މިންބެލުންތައް ދިރާސާކުރާ ޔޫ.އެސް ޖިއޮލޮޖިކަލް ސަރވޭއިން ބުނެއެވެ. ބިންހެލުން އައި ވަގުތު އެ ސަރަޙައްދުގައި ދިރިއުޅޭ ރައްޔިތުން ވަނީ މަގުތަކަށް ނިކުމެ، ސަލާމަތްކަން ހޯދަން މަސައްކަތް ކޮށްފައެވެ.
ބިންހެލުމާ ގުޅިގެން ގިނަ ޢަދަދެއްގެ ޢިމާރާތް ވެއްޓިފައިވާއިރު، އިތުރު ޢިމާރާތްތަކަށް ވަނީ ބޮޑެތި ގެއްލުންތަކެއް ލިބިފައެވެ. ބިންހެލުމާ އެކު ޢިމާރާތްތަކުގެ އިތުރުން މަގުތަކާއި ޢާންމު ޚިދުމަތްތައް ދިނުމަށް ބޭނުންކުރާ ޢިމާރާތްތަކާއި ވަސީލަތްތަކަށް ވެސް ވަނީ ގެއްލުން ލިބިފައެވެ. ނަމަވެސް، ފެނާއި މުވާސަލާތީ ޚިދުމަތްތަކަށް ބުރޫއަރާފައި ނުވާ ކަމަށް އޮފިޝަލުން ވިދާޅުވެއެވެ.
ޝަންދޮންގ ޕުރޮވިންސުގެ އޮފިޝަލުން ވިދާޅުވީ ބިންހެލުމާ ގުޅިގެން 21 މީހަކު ޒަޚަމުވެފައިވާ ކަމުގައެވެ. އަދި، ވެއްޓިފައިވާ ގެދޮރާއި އެހެން ޢިމާރާތްތަކުގެ ޢަދަދު 126 އަށް އަރާ ކަމުގައެވެ. ގިނަ މީހުންނަށް އަނިޔާވީ ޢިމާރާތްތައް ވެއްޓުމުންނެވެ. ބިންހެލުމާ ގުޅިގެން އިތުރު ޢިމާރާތްތަކަށް ގެއްލުން ލިބިފައިވާއިރު، އޭގެ ތެރެއިން އިތުރު ޢިމާރާތްތައް ވެއްޓުމުގެ ފުރުޞަތު އޮތް ކަމުގައި ވެސް އޮފިޝަލުން ވިދާޅުވިއެވެ.
މި ބިންހެލުމަށް ފަހު އެ ސަރަޙައްދަށް އިތުރު 52 ލޮޅުން އަރާފައިވާ ކަމަށް ޗައިނާގެ މިނިސްޓްރީ އޮފް އެމަރޖެންސީ މެނޭޖްމަންޓުން ބުނެއެވެ. އަދި، ބިންހެލުމާއި ލޮޅުންތަކުގެ އަސަރު ޝަންދޮންގާ އިންވެގެން އޮންނަ ހަރބޭއީ ޕުރޮވިންސަށް ވެސް ފޯރާފައިވާ ކަމުގައި އެ ޤައުމުގެ އިދާރާތަކުން ބުނެއެވެ. ބިންހެލުމާ ގުޅިގެން ގެދޮރަށް ގެއްލުންވެ، ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދޭން މިހާރު މަސައްކަތް ކުރަމުންދާ ކަމުގައި ވެސް އެ ވުޒާރާއިން ބުނެއެވެ.
މި ބިންހެލުމުގެ ލޮޅުންތައް ވެރިރަށް ބެއިޖިންގުގެ އިތުރުން ޓިއާންޖިންގެ އިތުރުން ޝަންދޮންގާ 800 ކިލޯމީޓަރު ދުރުގައި އޮތް ޝަންގްހާއީއަށް ވެސް ފޯރާފައިވެއެވެ. ޗައިނާއަކީ ބިންހެލުންތައް ޢާންމު ޤައުމެއް ނަމަވެސް، އެ ޤައުމުގެ އިރުމަތީ ސަރަޙައްދުތަކަށް ބިންހެލުންތައް އައުމަކީ ޢާންމު ކަމެއް ނޫން ކަމުގައި ޝަންދޮންގުގެ ބިންހެލުންތަކާ ބެހޭ އިދާރާއިން ބުނެއެވެ.
Ads by STO
