އަންހެނުންގެ ހާއްސަ ކެމްޕެއިން ހަރަކާތެއް އެމްޑީޕީގެ އަންހެނުންގެ ރޫހުން ބާއްވަނީ
ރާއްޖޭގެ ރިޔާސީ އިންތިހާބީ މޫސުން ފޯރިގަދަ ކަމާއިއެކީ ކުރިއަށް ދާ މިދަނޑިވަޅުގައި، "އުފާވެރި އަންހެނުން" (ޓީވިތްއިބޫ) ގެ ނަމުގައި އަންހެނުންގެ މާސް ކެމްޕެއިން ހަރަކާތެއް ބޭއްވުމަށް، އެމް.ޑީ.ޕީގެ އަންހެނުންގެ ރޫޙުން ނިންމައިފިއެވެ.
އެމްޑީޕީގެ އަންހެނުންގެ ރޫހުން މަޢުލޫމާތު ދިންގޮތުގައި މިހަރަކާތަކީ އެމް.ޑީ.ޕީގެ އަންހެނުންގެ ރޫހުން އިންތިޒާމްކޮށްގެން، ގުޅިފައިވާ ކޯލިޝަންގެ އަންހެން ކައުންސިލްގެ އިސް ބޭފުޅުންނާއި އެކުގައި ކުރިއަށް ގެންދިޔުމަށް ހަމަޖެހިފައިވާ، އަންހެނުންނަށް ހާއްސަ ހަރަކާތެކެވެ.
އެމްޑީޕީގެ އަންހެނުންގެ ރޫހުން ހިއްސާ ކުރިގޮތުގައި މި ހަރަކާތަކީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހް ބައިވެރިވެވަޑައިންނަވާ، ޚާއްސަ ހަވީރު ސައެކެވެ. އަދި މިހަރަކާތް މުޅި ރާއްޖެއަށް ލައިވް ކުރެވި، ރާއްޖޭގެ އެކި ކަންކޮޅުތަކުގައި ރައީސަށް ތާއީދު ކުރައްވާ އެންމެހާ އަންހެން ބޭފުޅުންނަށް ބައިވެރިވެވޭ އިންތިޒާމްތައް ވެސް ވަނީ ހަމަޖެހިފައިވެއެވެ.
އެގޮތުން މީހުން ދިރިއުޅޭ ހުރިހާ ރަށެއްގައި މި ސައި ކުރިއަށްދާނީ އެއްވަގުތެއްގައެވެ. އަދި މާލޭގައި ރައީސް ބައިވެރިވެޑައިންނަވާ ހަފްލާ، ގުޅިފައިވާ ކޯލިޝަންގެ ހުރިހާ ހަރުގެތަކުގައި ލައިވްކޮށް ދެއްކިގެން ކުރިއަށް ދާނެ ކަމަށްވެސް އެމްޑީޕީގެ އަންހެނުންގެ ރޫހުން ހިއްސާ ކުރިއެވެ.
އެމްޑީޕީ އަންހެނުންގެ ރޫޙުގެ ރައީސާ އަދި އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވިގޮތުގައި، "އެމްޑީޕީގެ އަންހެނުންގެ ރޫޙަކީ ސިޔާސީ ޕާޓީއެއްގައި އެންމެ ގިނަ އަންހެން މެމްބަރުން ހިމެނޭ އަންހެނުންގެ ގޮފި. މި ރޫޙުގެ އަމާޒަކީ ސިޔާސީ ހުރިހާ ހަރަކާތެއްގަޔާއި ތަންފީޒީ މަރުހަލާ ތަކުގައި އަންހެން މެމްބަރުންގެ ބައިވެރިވުމާއި ހިއްސާ ފުޅާކޮށް އިތުރުކުރުން."
މީގެއިތުރުން ރޮޒެއިނާ ވިދާޅުވީ މިހަރަކާތުގައި، ރައީސް އިބްރާހިމް މުހައްމަދު ސޯލިހް، އެމް.ޑީ.ޕީ އަދި ގުޅިފައިވާ ޕާޓީތަކުގެ މެމްބަރުން ހިމެނޭހެން ރައީސަށް ތާއީދު ކުރައްވާ އެންމެހާ އަންހެން ބޭފުޅުންނާއި މުޙާތަބުކޮށް ވާހަކަފުޅު ދެއްކެވުމަށް ވެސް ހަމަޖެހިފައިވާ ކަމަށެވެ.
