ރިޔާސީ ކެމްޕެއިނުގައި ދައުލަތުގެ މުދާ ބޭނުން ނުކުރަން އެދިއްޖެ
އަންނަ މަހުގެ ނުވަ ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަކުރައްވާ ބޭފުޅުން ކެމްޕޭން ކުރުމަށް ދައުލަތުގެ މުދާ ބޭނުންނުކުރުމަށް އެންޓި ކޮރަޕްޝަންސް ކޮމިޝަން (އޭސީސީ) އިން އިލްތިމާސްކުރައްވައިފިއެވެ.
Ads by STELCO
އެ ކޮމިޝަނުން މިކަމަށް އިލްތިމާސް ކުރައްވައިފައިވަނީ، ނެރުއްވި ބަޔާނެއްގައެވެ.
އޭސީސީން ވިދާޅުވީ، ސެޕްޓެމްބަރު ނުވައެއްގައި ބާއްވަން ހަމަޖެހިފައިވާ ރިޔާސީ އިންތިޚާބަށް ކެމްޕޭން ކުރަން ދައުލަތުގެ މުދާ ބޭނުން ކުރުން ހުއްދަވާ ހާލަތްތައް ގާނޫނުގައި ބަޔާން ކޮށްފައި ވާނެ ކަމަށެވެ.
އެހެންވެ ގާނޫނާ ހިލާފަށް ކެމްޕޭން ކުރަން ދައުލަތުގެ މުދަލެއް ބޭނުންކުރުމަކީ އެއްވެސް ހާލެއްގައި ހުއްދަ ކަމެއް ނޫން ކަމަށާއި، ކެމްޕޭން ހަރަކާތްތައް ޤާނޫނީ އިމުގެ ތެރޭގައި ބެހެއްޓުމަށާއި ކެމްޕޭން ހަރަކާތްތައް ހިންގާ ތަންތަނުގައި އެ ހަރަކާތްތައް ހިންގަން ހުއްދަ ހޯދަން ޖެހޭނެ ކަމަށެވެ.
އަދި ޤާނޫނާއި ގަވައިދާ ޚިލާފަށް ދައުލަތުގެ މުދާ ބޭނުންކޮށް ކެމްޕޭން ހަރަކާތް ހިންގުމުގެ ހުއްދަ ނުދިނުމަށްވެސް އެ ކޮމިޝަނުން ވަނީ ދައުލަތުގެ އިދާރަތަަކަށް އިލްތިމާސްކޮށްފައެވެ.
ކޮމިޝަނުން ވިދާޅުވީ، އެ ތަނުން އަންގާފައިވާ ގޮތަށް ކެމްޕޭނާ ގުޅޭ ކަންތައްތައް ހިންގަމުންދޭތޯ ބަލަމުންދާނެ ކަމަށެވެ. އަދި އާންމުންގެ ފަރާތުން ކޮމިޝަނަށް ހުށަހެޅޭ މައްސަލަތައް ގާތުން ބަލަމުންދާނެ ކަމަށްވެސް ވިދާޅުވިއެވެ.
ޤާނޫނު ހުއްދަކުރާ ގޮތާ ޚިލާފަށް ކެމްޕޭން ކުރުމުގައި ދައުލަތުގެ މުދާ ބޭނުންކޮށްފި ހާލަތެއްގައި ޤާނޫނީ ގޮތުން ފިޔަވަޅު އަޅާނެ ކަމުގެ އިންޒާރުވެސް އޭސީސީ އިން ދީފައިވެއެވެ.
Ads by HDC
