ޕީޕީއެމްގެ ލީޑަރު އަދި ކުރީގެ ރައީސް، ރައީސް ޔާމީނު ޖަލުގައި ހުންނަވަން ޖެހުމުން އެކަމާމެދު ކަންބޮޑުވެވަޑައިގަންނަވާ ކަމަށާއި ނަމަވެސް ޝަރީއަތެއްގެ މެދުތެރޭގައި އޮއްވައި އެއާ ދޭތެރެއަކު ގޮތެއް ނިންމުމުގެ ބާރެއް ނޯންނަކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ އެމްޑީޕީގެ ކެމްޕޭނަށް ރަށްރަށަށް ކުރައްވާ ދަތުރުފުޅުތަކުގައި އއ. ރަސްދޫއަށް މިއަދު ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ. އެގޮތުން، ޕީޕީއެމަށް އަނެއްކާވެސް ފުރުސަތު ލިބިއްޖެނަމަ ވާނެގޮތާމެދު ވިސްނާލަން ޖެހޭ ކަމަށާއި، ޕީޕީއެމްގެ ވެރިކަމުގައި ތަހައްމަލު ކުރި ވޭނާއި ހުރަސްކުރަންޖެހުނު ކަންތައްތައް އަދި ހަނދާނުން ފިލައިގެން ނުދާކަމަށް ރައީސް ޞާލިޙް ވިދާޅުވިއެވެ.
މީގެ އިތުރުން، ސިޔާސީ ހިޔާލުތަފާތުވުންތައް އެކަހެރިކޮށް، ރިޔާސީ އިންތިހާބަކީ ގައުމަށާއި ރަށަށް ވާގޮތަކާގުޅޭ އެއްޗަކަށްވާތީ އެކަމަށް ވިސްނުމަށްފަހު ވޯޓު ދެއްވުމަށް އެދިވަޑައިގަންނަވާކަމަށާއި، އިދިކޮޅުން އަބަދުވެސް ދައްކަނީ އެބޭފުޅުން ވެރިކަމަށް އަތުވެއްޖެނަމަ ކޮންމެވެސް މީހަކު ޖަލުގައި ބައިންދާނެ ވާހަކަ ކަމަށާއި އެހެންނަމަވެސް އެމަނިކުފާނުގެ އެ ވިސްނުން ނެތްކަމަށް ރައީސް ޞާލިޙް ވިދާޅުވިއެވެ.
ހަމައެއާއެކު ރައީސް ޔާމީން ޖަލުގައި އިންނަވަން ޖެހުނުކަމީ، އިދިކޮޅުވެސް އަދި ހުރިހާ އެންމެންވެސް ކަންބޮޑުވާކަމެއްކަމަށް ރައީސް ޞާލިޙް ވިދާޅުވިއެވެ.
"ޝަރުއީ ދާއިރާގެ ތެރެއަކަށް އަޅުގަނޑުމެނެއް އަތެއް ނުބާނާނަން. މިނިވަން ކަމާއެކީގައި ޖުޑިޝަރީ ހިންގުމުގެ ބާރު މި ވޭތުވެދިޔަ ފަސް އަހަރު ދުވަހުގެ ތެރޭގައި ފެނިގެން ގޮސްފައިވާނެ..އަޅުގަނޑު މިދެންނެވީ، ރައީސް ޔާމީން ޖަލުގައި އިންނަވަން ޖެހުނުޖެހުން، އެއީ އެ ބޭފުޅުންގެ ކަންބޮޑުވުމެއް. އަޅުގަނޑުމެން އެންމެންވެސް ކަންބޮޑުވޭ އެކަމާ. އެހެންނަމަވެސް، ޝަރީއަތެއްގެ މެދުތެރޭގައި އޮއްވައި އެއާ ދޭތެރެއަކު ގޮތެއް ނިންމުމުގެ ބާރެއް އަޅުގަނޑަކަށް ނޯވޭ" ރައީސް ޞާލިޙް ވިދާޅުވިއެވެ.
އެހެންކަމުން، ޝަރީއަތުގެ ތެރެއަށް "އަތްބޭނުމަށް" އެއްވެސް ބަޔަކަށް އެމަނިކުފާނަށް ނުފޫޒު ނުފޯރުވޭނެ ކަމަށާއި އެކަން އެމަނިކުފާނު ނުކުރައްވާނެ ކަމަށް ފާހަގަކުރައްވަމުން ރައީސް ޞާލިޙް ވިދާޅުވީ، ޝަރުއީ ދާއިރާއާއި މިނިވަން މުއައްސަސާތައް ފުރިހަމައަށް މިނިވަންކަމާއެކު ހިންގުމުގެ ފުރުސަތު މިއަދު އޮންނާނެ ކަމަށެވެ.
Ads by STO
