ރައީސް ޞާލިޙު ރިޔާސީ ބަހުސްގައި ބައިވެރިވެވަޑައިގަންނަވާނެ
އަންނަ ރިޔާސީ އިންތިހާބަށް ކުރިމަތިލި ކެންޑިޑޭޓުންގެ މެދުގައި، އެމްއެންޔޫ އަދި ދައުލަތުގެ މީޑިއާއިން ގުޅިގެން ބާއްވާ ރިޔާސީ ބަހުސްގައި ވެރިކަން ކުރާ މައި ޕާޓީ އެމްޑީޕީގެ ކެންޑިޑޭޓް އަދި ރައީސް އިބްރާހީމް މުޙައްމަދު ޞާލިޙު ބައިވެރިވެވަޑައިގަންނަވާނެ ކަމަށް އެމަނިކުފާނުގެ ކެމްޕެއިން ތަރުޖަމާނު، ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
މާރިޔާ މިކަން ހާމަކުރެއްވިއިރު، ސަންގު ޓީވީގެ ރިޔާސީ ބަހުސްގައި ވެސް ރައީީސް ޞާލިޙު ބައިވެރިވެވަޑައިނުގަންނަވާކަމަށާއި، އެ ބަހުސަށް އެމަނިކުފާނު ފިއްލަވައިފައިވާކަން އެ ޓީވީން އިއްޔެ ހާމަ ކުރުމުން، ގިނަ ބައެއްގެ ފާޑުކިޔުންތައް އަމާޒުވިއެވެ.
ފަހު ވަގުތު، ރިޔާސީ ބަހުސްގައި ބައިވެރިވެވަޑައިގަންނަވަން ރައީީސް ނިންމެވި ނިންމެވުމާއި ގުޅޭގޮތުން މާރިޔާ ވިދާޅުވީ، އެއީ އިލްމީ ބަހުސެއް ހިނގާނެ ތަނެއް ކަމަށާއި، ޔުނިވާސިޓީތަކުގައި އިލްމީ ގޮތުން ވާހަކަ ދައްކަވާފައި ޕޮލިސީތައް ދިރާސާކޮށް އުޅޭނެ ކަމަށެވެ.
"އެކަމަކު މީޑިއާތަކަށް އަރައި އިޝްތިހާރު ވުމަށް ޓަކައި ކުރާ ބަހުސް ތަކަކީ ރައީސް ގަބޫލު ކުރައްވާ ކަމެއް ނޫން" ކަމަށެވެ.
އަދި މީޑިއާތަކުން ކުރިއަށްގެންދާ ވަކިވަކި ބަހުސަށް ރައީީސް ނާރާނެ ކަަމަށް ވެސް މާރިޔާ ވަނީ ވިދާޅުވެފައެވެ.
"އެއަށްވުރެ ރައީސަށް މުހިންމީ ރަށްރަށަށް ވަޑައިގެން ރައްޔިތުންނާ ބައްދަލުކުރެއްވުން" މާރިޔާ ވިދާޅުވިއެވެ.
