އަޅުގަނޑުމެންގެ ސަރުކާރު ވާނީ، ރައްޔިތުންނަށް ކަންކަން ކޮށްދޭ ސަރުކާރަކަށް: މުއިއްޒު
ޕީޕީއެމް-ޕީއެންސީގެ ސަރުކާރުގެ ވެގެންދާނީ، ރައްޔިތުންނަށް ކަންކަން ކޮށްދޭ ސަރުކާރަކަށް ކަމަށް އެ ކޯލިޝަންގެ ރިޔާސީ ކެންޑިޑޭޓް، ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕެއިނުގައި ތ.މަޑިފުއްޓަށް މިއަދު މުއިއްޒު ވަޑައިގެންނެވުމުން، އެ ރަށުން އެމަނިކުފާނަށް "ފިޔާތޮށި ކުލަ"އިން ވަރަށް ހޫނު މަރުހަބާއެއް ކިޔައިފައިވެއެވެ. މުއިއްޒު ވިދާޅުވީ، އެމަނިކުފާނަށް ރިޔާސީ އިންތިހާބު އެއްބުރުން ކާމިޔާބު ކުރެވުމުގައި، މަޑިފުށިން ބޮޑު ދައުރެއް އަދާ ކުރާނެ ކަމަށް އުއްމީދު ކުރައްވާ ކަމަށެވެ.
މަޑިފުށީގެ މަގު ހެދުމުގެ މަޝްރޫޢު ހުއްޓިފައިވާއިރު، އެކަން ކޮށްދެއްވާނެކަމުގެ ޔަޤީންކަން މުއިއްޒު ދެއްވިއެވެ.
"މަގު ހެދުމަކީ މި ރަށަށް މުހިންމު މަޝްރޫޢުއެއް، އެހެންވީމާ، ތި ބޭފުޅުންނަށް ތި ދިމާވާ ތަކްލީފު ނިމުމަކަށް ގެނެސްދީ، ޒަމާނީ ފެންވަރުގައި، މި ރަށުގައި ބޮޑެތި މަގުތައް ހެދުމުގެ މަަޝްރޫއެއް ކުރިއަށް ގެންގޮސްދޭނަން." އެމަނިކުފާނު ވިދާޅުވިއެވެ.
މީގެ އިތުރުން ވެސް، އެ ރަށުގެ ސްކޫލް، ރަށުގެ މެދުތެރެއަށް ބަދަލުކޮށް، 10 ޓަނުގެ އައިސްޕްލާންޓެއް ގާއިމު ކުރުމަށް ވެސް ވަޢުދުވެވަޑައިގެންނެވިއެވެ. އަދި ޒުވާނުންނަށް ބޭނުންވާ ކަންކަމާއި، ގެދޮރުވެރިކަމުގެ މަޝްރޫއުތައް ވެސް ހިންގަވާނެ ކަމަށް ވިދާޅުވިއެވެ.
