އެ ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ފުއާދު ވިދާޅުވީ މަޖިލީހުން ހުށައެޅި ގަރާރުގައި އޮކްޓޫބަރު 30ގެ ކުރިން ނިޒާމީ ވޯޓެއް ނެގަން ބަޔާންކުރާ ކަމަށެވެ.
މިކަމާ ގުޅިގެން އެ ކޮމިޝަންގެ މެންބަރުންގެ މެދުގައި މަޝްވަރާކޮށްފައިވަނީ، އަންނަ މަހުގެ 29 ވަނަ ދުވަހު ވޯޓު ނެގުމަށް ކަމަށް ފުއާދު ވިދާޅުވިއެވެ.
ނަމަވެސް އެކަމަށް އޮތް އެންމެ ބޮޑު ދައްޗަކީ ބަޖެޓު ކަމަށް ފުއާދު ވިދާޅުވިއެވެ.
ފުއާދު ވިދާޅުވީ ބަޖެޓުގެ ދަތިކަން ހައްލުކުރުމަށް ކަމާ ބެހޭ މުއައްސަސާތަކާ މަޝްވަރާކުރަމުން އަންނަކަމަށާއި، ޢާންމުން ހޭލުންތެރި ކުރުމަށްވެސް ގިނަ މަސައްކަތްތަކެއް ކުރަން ހުރިކަމަށެވެ.
ފުއާދު ވިދާޅުވީ ނިޒާމީ ވޯޓެއް ނެގުމާއި ގުޅޭ ޤާނޫނެއް ނެތުމުން، ޤަވާއިދެއް ހެދުމުގެ މަސައްކަތް ކުރަމުން އަންނަކަމަށެވެ.
އީސީން ބުނެފައި ވަނީ، ނިޒާމީ ވޯޓެއް ނެގޭނީ ރިޔާސީ އިންތިޚާބުގެ ދެވަނަ ބުރަށްފަހުގައި ކަމަށާއި، އެކަމަށް 30އާއި 45 ދުވަސް މަދުވެގެން ބޭނުންވާކަމަށެވެ.
