"ރަސޯއޭ މޭ ކޯން ތާ؟"
ދިވެހިންނަކީ ޒަމާނުއްސުރެ އިންޑިއާގެ ޑްރާމާތަކަށް ލޯބިކުރާ ބައެކެވެ. ކަސޯޓީ ޒިންދަގީ އިންނާއި ކުމްކުމް ފަދަ ޑްރާމާތަކުން ފެށިގެން އައިސް ޔޭ ރިޝްތާ ކިޔާ ކެހެލާތާ ހޭ އާއި ސާތު ނިބާނާ ސާތިޔާ އަކީ ދިވެހިންގެ ތެރޭގައި އެންމެ މަގުބޫލު ކަން ހޯދި ސިލްސިލާތަކެވެ.
ވަކިން ހާއްސަކޮށް ސާތު ނިބާނާ ސާތިޔާ އަކީ އޭގައި ކޯކިލާ މޯދީގެ ރޯލަށް ގިނަ ބައެއްގެ ޝައުގުވެރިކަން ދަމައިގަތް ޑްރާމާއެއް ކަން ފާހަގަކޮށްލަން ޖެހެއެވެ. 2010 ވަނަ އަހަރު އެއާ ކުރަން ފެށި މި ސީރީޒް އަކީ ދިވެހި އަންހެނުންގެ އިތުރުން ގިނަ ފިރިހެނުން ވެސް ގަވައިދުން ބަލަމުން އައި ޑްރާމާއެކެވެ. މި ޑްރާމާ ނިމުނުތާ ތިން އަހަރު ފަހުން އަނެއްކާ ވެސް މިވަނީ މި ޑްރާމާގެ އަޑު މީސް މީޑިއާގައި ގަދަވެފައެވެ.
ޔަޝްރާޖް މުކާޓޭ ނަމަކަށް ކިޔުނު އިންޑިއާގެ ޔޫޓިއުބަރެއް މީސް މީޑިއާ އަށް ދޫކޮށްލި ސާތު ނިބާނާ ސާތިޔާގެ ވީޑިއޯ ކޮޅެއްގެ ރިމިކްސް އާއެކު، މިހާރު މުޅި މީސް މީޑިއާގައި އެންމެން އެއް އަޑަކުން ދައްކަމުން އަންނަނީ އެއް ވާހަކައެކެވެ. ކުރަމުން އަންނަނީ އެއް ސުވާލެކެވެ. "ރަސޯއި މޭ ކޯން ތާ" ނުވަތަ ބަދިގޭގައި ހުރީ ކާކު ހެއްޔެވެ.
އުމުރުން 24 އަހަރުގެ ޔަޝްރާޖު ބުނި ގޮތުގައި އޭނާ އަށް މި ޑައިލޮގް ކޮޅު ފެނިފައިވަނީ ފޭސްބުކުންނެވެ. އަދި އެ ފެނުމާއެކު ހެން އޭނާ ސިކުނޑިއަށް އެ ޑައިލޮގު ކޮޅު ލަވައެއްގައި ސިފަވިއެވެ. ނަމަވެސް އޭނާ މިއުޒިކު އެއް ކުޅެ ރިމިކްސް އެއް ހެދުމަށް ފަހު މީސް މީޑިއާ އަށް އެ ދޫކޮށްލީ މާ ބޮޑު ވިސްނުމެއް ނެތި ކަމަށާއި މިވަރުގެ ތަރުހީބެއް ލިބިދާނެ ކަމަށް ހީވެސް ނުކުރާ ކަމަށް ޔަޝްރާޖު ބުނެފައިވެއެވެ.
ޔަޝްރާޖު ތައްޔާރު ކުރި ވީޑިއޯއަކީ ކައްކަން އުޅުނު ސަނާމުގު އެތި ތެއްޔަށް ނާޅާ އުނދުން ރޯކޮށްފައި ބެހެއްޓުމުން އެކަމުގެ ސަބަބުން ކޯކިލާ އޭނާގެ ދަނބި ދަރިންތައް ކަމަށްވާ ރާޝީ އަދި ގޯޕީ އާ ދިމާލަށް ހަޅޭލަވާ މަންޒަރު ފެންނަ ސާތު ނިބާނާ ސާތިޔާ ގެ އެޕިސޯޑެއްގެ ތަންކޮޅެކެވެ.
މި ވީޑިއޯ އަށް އިންސްޓަގްރާމް އިން އެކަނި ތިން މިލިއަނަށް ވުރެ ގިނަ ވިއުސް ލިބިފައިވާއިރު، ޔަޝްރާޖު ކުރި މަސައްކަތަށް ތައުރީފު ކުރުމަށް ކޯކިލާ ވައުގެ ރޯލުން ފެނިގެން ދިޔަ ރޫޕަލް ޕަޓޭލް ވެސް ވަނީ ޔަޝްރާޖު އަށް ގުޅާ އޭނާ ކުރި މަސައްކަތަށް ތައުރީފުކޮށްފައެވެ. މިއީ މިހާތަނަށް މި ވީޑިއޯ އަށް ލިބުނު އެންމެ ބޮޑު ކާމިޔާބީގެ ގޮތުގައި ޔަޝްރާޖު ފާހަގަކުރެއެވެ.
ކޯކިލާ ވައު ގެ އިތުރުން ބޮލީވުޑުގެ މަޝްހޫރު ފަންނާނުންގެ ސަމާލުކަމަށް ވެސް މި ވީޑިއޯ އައިސްފައިވާ ކަން ފާހަގަކޮށްލަންޖެހެއެވެ. އެގޮތުން ތާޕްސީ ޕަންނޫ، ވަރުން ދާވަން އަދި އާރް ރާޖްކުމާރް ފަދަ ތަރިން ހިމެނެއެވެ.
ސާތު ނިބާނާ ސާތު ހިޔާ ގެ މަންޒަރުތަކަކީ އަބަދުވެސް މީސްމީޑިޔާގައި މީމްސްތައް ހަދައިގެން ދައުރު ކުރަމުން އަންނަ ސޯޕްއޮޕޭރާއެކެވެ. މިގޮތުން އެ ސީރީޒްގައި ފެނިގެންދާ ބަތަލާ ކަމަށްވާ، ގޯޕީ، އޭނާގެ ފިރިމީހާގެ ލެޕްޓޮޕް ދޮންނަ މަންޒަރުވެސް މީގެ އަހަރެއް ކުރިން މީމްތަކެއްގެ ސިފައިގައިވަނީ ދައުރުވެފައެވެ.
