ސޭޓަށް ހަމަލާ ދިން މީހާގެ ބަންދަށް އިތުރު 15 ދުވަސް

މާލޭގެ ފޯނު ވިއްކާ ފިހާރައަކަށް ވަދެ، ސޭޓަށް ހަމަލާދިން މައްސަލައިގައި ހައްޔަރުކުރި މީހާގެ ބަންދަށް 15 ދުވަސް ކްރިމިނަލް ކޯޓުން އިތުރުކޮށްފިއެވެ.

Ads by MWSC

މި މައްސަލައިގައި ހައްޔަރު ކޮށްފައި ވަނީ ތ. ތިމަރަފުށީ، ސަލްވާ އުމުރުން 29 އަހަރުގެ ފާތިމަތު ޝަހުދާއެވެ.

ކްރިމިނަލް ކޯޓުން އޭނާގެ ބަންދުގެ މުއްދަތު އިތުރުކޮށްފައި ވަނީ އިއްޔެއެވެ. ބަންދުގެ މުއްދަތު އިތުރު ކުރީ، އޭނާގެ ބަންދަށް ކްރިމިނަކް ކޯޓުން ފުރަތަމަ ދިން 15 ދުވަސް ހަމަވުމާ ގުޅިގެންނެވެ.

އޭނާ ބަންދުގައި ބެެހެއްޓުމަށް ކްރިމިނަލް ކޯޓުން ކުރި އަމުރުުގައި އޭނާ އެ ކުށް ކުރި ކަމަށް ތުހުމަތު ކުރެވޭ އެކަށީގެންވާ މިންވަރުގެ ހެކި ގަރީނާ ހުށަހަޅާފައިވާ ކަން ފާހަގަކޮށްފައިވެއެވެ. އެގޮތުން ސީނަށް ދިޔަ ފުލުހުންގެ ހާދިސާ ރިޕޯޓް، ހާދިސާ ހިނގިތަނުގެ ސީސީޓީވީ ސްނެޕް ޝޮޓޫތައް އަދި ހާދިސާ ހިނގިތަނުގެ ވީޑިއޯ ފުޓޭޖް ހުށަހަޅާފައިވެއެވެ.

އެ އަމުރުުގައި އިތުރަށް ވަނީ އޭނާ ބަންދުގައިބެހެއްޓުމަށް އަމުރު ކުރި ހާލަތަކީ ޖިނާއި އިޖުރާއަތުގެ ގާނޫޏުގެ ދަށުން މުޖުތަމައުގެ ސަލާމަތާއި ރައްކާތެރި ކަމަށްޓަކައި ކަމަށެވެ.

އޭނާއަކީ މީގެ ކުރިން ވެސް މިފަދަ ކުށުގެ ރިކޯޑު އޮންނަ މީހެކެވެ.

ސޯޝަލް މީޑިއާގައި ދައުރުވި ވީޑިއޯއިން ފެންނަ ގޮތުގައި، މިކަން ހިނގީ، ޗާންދަނީމަގުގައި ހުންނަ "ޑްރީމްސް މޯބައިލް" ފިހާރައިގައެވެ.

ޝަހުދާ އެ ފިހާރައިގައި ހުރި ސޭޓު ކައިރީ ފޯނެއް ދެއްކުމަށް އެދެއެވެ. ދެން ފެންނަނީ ޒުވާބު ކުރާ މަންޒަރެވެ.

އެއަށް ފަހު މީހަކު އާދޭތޯ ބެލުމަށް ފަހު ވާއަތު ޖީބުން ވަަޅި ނަގައި ސޭޓުގެ ކަރުގައި ވަޅި އަޅާ މަންޒަރު ވެސް ފެނެއެވެ.