މަޖިލިސް އިންތިޚަާބު ބާއްވާނެ ތާރީޚު އަންނަ މަހުގައި އިޢުލާނު ކުރަނީ
އަންނަ އަހަރު ބާއްވަން ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބު ބާއްވާނެ ތާރީޚެއް އަންނަ ނޮވެމްބަރު މަހުގެ ތެރޭގައި އިއުލާނު ކުރުމަށް މަސައްކަތް ކުރަމުންދާ ކަމަށް އިލެކްޝަންސް ކޮމިޝަން (އީސީ) އިން މިއަދު ވިދާޅުވެއްޖެއެވެ.
އީސީގެ ނައިބު ރައީސް އިސްމާޢީލް ޙަބީބް އެކްސްގައި ކުރެއްވި ޕޯސްޓެއްގައި ވިދާޅުވީ ރައްޔިތުންގެ މަޖލީހުގެ އިންތިޚާބުގެ ގާނޫނުގައިވާ ގޮތުގެ މައްޗަށް ބަލާއިރު ރައްޔިތުންގެ މަޖިލީހުގެ އިންތިޚާބު 2024 ބޭއްވޭނީ މާޗް މަހުގެ ފަހުކޮޅު ނުވަތަ އޭޕްރީލްމަހުގެ ކުރީކޮޅު ކަމަށެވެ.
އޭނާ ވިދާޅުވީ އިންތިޚާބު ބާއްވާ ދުވަސް ރޯދަމަހާއި ދިމާވުން ވަރަށް ގާތް ކަމަށާއި، އެއީ ޤާނޫނު އޮތްގޮތުން ދިމާވާ ކަމެއް ކަމަށެވެ.
އީސީއިން އަންނަނީ ރައްޔިތުންގެ މަޖިލީހުގެ 2024 ވަނަ އަހަރުގެ އިންތިޚާބީ ދާއިރާތަކަށް އާބާދީ ކަނޑައަޅާފައިވާ ގޮތުގެ ފައިނަލް ރިޕޯޓު އަންނަ ނޮވެމްބަރުމަހުގެ ތެރޭގައި އާންމު ކުުރުމަށް މަސައްކަތް ކުރަމުންނެވެ.
މަޖިލިސް އިންތިޚާބަށް ސިޔާސީ ޕާޓީތަކުން ތައްޔާރުވަމުން އަންނައިރު، މި އިންތިޚާބުގައި ވާދަ ކުރަން ގިނަ ބަޔަކު ދަނީ ޝައުގުވެރިކަން ފައުޅުކުރަމުންނެވެ.
އީސީގެ ނައިބު ޙަބީބް ވިދާޅުވީ ރައްޔިތުންގެ މަޖިލީހުގެ އިންތިޚާބު 2024 ބާއްވާނެ ތާރީޚެއް ނޮވެމްބަރު މަހުގެ ތެރޭގައި ކޮމިޝަނުން އާންމު ކުރުމަށް މަސައްކަތް ކުރަމުންދާ ކަމަށެވެ.
