ރައީީސް ޔާމީން ހުޅުމާލޭގެ ފޭސް 2އަށް ވަޑައިގަންނަވަނީ

އިދިކޮޅު ލީޑަރު، ރައީސް ޔާމީން ޢަބްދުލްޤައްޔޫމް ހުޅުމާލޭގެ ދެވަނަ ފިޔަވަހީގެ ރައްޔިތުންނާއި ބައްދަލު ކުރައްވާ ގޮތަށް ހަމަޖެހިއްޖެއެވެ.

Ads by MWSC

ރައީސް ޔާމީން ބައިވެރިވެވަޑައިގަންނަވާ ވަރަށް ޚާއްސަ ޖަލްސާއެއް 3 ނޮވެމްބަރުވާ ހުކުރު ދުވަހުގެރޭ ހިޔާ ސަރަހައްދުގައި ބޭއްވުމަށް ވަނީ ނިންމައިފައެވެ.

ރައީސް ޔާމީންގެ މައްޗަށް ވ.އާރަށު މުޢާމަލާތާއި ގުޅިގެން އިއްވައިފައިވާ 11 އަހަރުގެ ޖަލު ޙުކުމަށް، މޯލްޑިވްސް ކަރެކްޝަނަލް ސަރވިސް އިން ދިން ލުޔާއެކު އެމަނިކުފާނު ގެންދަަވަނީ ސަޕޯޓަރުންނާއި ބައްދަލުކުރައްވަމުންނެވެ.

އެމަނިކުފާނުގެ ބަންދަށް ލުއި ދިނީ، ކަރެކްޝަންސް އިން ހާމަ ކުރައްވާ ގޮތުގައި، އިޤުރާރެއްގައި ސޮއި ކުރެއްވުމުންނެވެ.

ކަރެކްޝަންސްގެ މީޑިއާ އޮފިޝަލަކު ވިދާޅުވީ ބޭސްފަރުވާ އާއި ކަސްރަތުކޮށް އުޅުމަށް އިތުރު ލުއިތަކަކަށް ރައީސް ޔާމީން އެދިވަޑައިގެންފައިވާތީ އެކަން ފަހިކޮށްދީފައިވާ ކަމަށެވެ.

އޭގެ އިތުރުން، ކޮންމެހެން ބައްދަލުކުރަން އެދޭ މީހުންނާ ވެސް، އެ އިދާރާއާ އެކަން ހިއްސާކުރުމުން ބައްދަލުކުރުމުގެ ފުރުސަތު ފަހިކޮށްދޭނެ ކަމަށް ވިދާޅުވިއެވެ.

"ކުރުން މަނާ ކަންތައްތަކެއް ވެސް އިގުރާރުގައި ހިމަނާފައިވާނެ. ވީމަ، މި ސާވިސް އިން މި ގެންދަނީ ރައީސް ޔާމީންގެ އަމަލުތައް މޮނީޓާކުރަމުން. އިގުރާރާ ހިލާފުވާ ނަމަ ފިޔަވަޅު އަޅާނެ ކަމުގައި ދަންނަވާފައި ވާނެ،" ލިޔުމުން ދިން ޖަވާބުގައި ކަރެކްޝަންސް އިން މީގެ ކުރިން ވިދާޅުވިއެވެ.

ލިބިވަޑައިގެންނެވި ލުޔަށްފަހުގައި، ރައީސް ޔާމީން ވަނީ ޕީޕީއެމްގެ އޮފީހުގައި ބޭއްވި ޖަލްސާއެއްގައި ވެސް ބައިވެރިވެވަޑައިގެންފައެވެ. އެމަނިކުފާނު ދެއްކެވި ވާހަކަފުޅުގައި ރާއްޖޭގައި ތިބި އިންޑިއާގެ ސިފައިން ބޭލުމާއި، ޗާގޯސް މައްސަލައިގައި ގެއްލުނު ކަނޑުގެ ސަރަހައްދު ހިމާޔަތް ކުރުމުގެ މުހިންމު ކަމަށް އަލިއަޅުވައިލެއްވިއެވެ.