އީވާ ނެތަސް ރައީސް ނަޝީދުގެ މައްސަލަ ކުރިއަށް ގެންދަން ޕީޕީއެމް-ޕީއެންސީން ވެސް އެދިއްޖެ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރުނެތް ކަމަށް މަޖިލީހަށް ހުށަހަޅާފައިވާ ޤަރާރު ކުރިއަށް ގެންދިއުމަށް މަޖިލީހުގެ ނައިބު ރައީސް އީވާ އަބްދުﷲ ނެތް ހާލަތުގައި އާންމު މެމްބަރަކު ރިޔާސަތު ބަލަހައްޓަވާ ގޮތަށް ކަނޑައަޅައިދޭން ޕީޕީއެމް-ޕީއެންސީގެ ފަރާތުން ވެސް ސުޕްރީމް ކޯޓުގައި މިއަދު އެދިއްޖެއެވެ.
ޕީޕީއެމް-ޕީއެންސީގެ ފަރާތުން ސުޕްރީމް ކޯޓުގައި މިގޮތަށް އެދިފައި ވަނީ އެމްޑީޕީން ސުޕްރީމް ކޯޓަށް ހުށަހަޅާފައިވާ އެ މައްސަލައިގެ ފުރަތަމަ އަޑު އެހުމުގައެވެ.
އެ ކޯލިޝަނުގެ ފަރާތުން އެދޭ ގޮތް ހާމަކުރުމަށް ދިން ފުރުސަތުގައި ވަކާލާތު ކުރެއްވީ، ކުރީގެ ބަންޑާރަ ނައިބު އައިޝަތު އާޒިމާ ޝަކޫރެވެ.
އެގޮތުން އާޒިމާ ވަނީ މި މައްސަލައިގައި ދުސްތޫރީ އޮނިގަނޑުގެ ތެރެއިން ދައުލަތުގެ އެއްވެސް ބާރެއް ނުހުއްޓި ކުރިއަށް ގެންދިއުމަށް ޒިންމާ ހަވާލުވެފައިވާ ފަރާތްތައް އެ ފަރާތްތަކުގެ ޒިންމާ އަދާ ކުރުމަށް އަމުރެއް ނެރެދެއްވުމަށް އެދިވަޑައިގެންފައެވެ.
އާޒިމާ ވިދާޅުވީ މި މައްސަލާގައި އުޅެނީ ޤާނޫނު އަސާސީ ތަރުޖަމާ ކުރުމާއި މަޖިލީހުގެ ގަވާއިދު މާނާ ކުރުމުގައި މައްސަލައެއް ކަމަށެވެ.
މަޖިލީހުން ޤާނޫނުއަސާސީއާ ހިލާފަށް ނެރޭ މާނަކުރުންތަކެއްގެ ސަބަބުން ރިޔާސީ އިންތިޚާބެއް ވެސް ނިމިގެން މިދިޔައީ މަޖިލިސް ހުއްޓިފައި އޮވެގެން ކަމަށް އާޒިމާ ވަނީ ފާހަގަކުރައްވާފައެވެ.
އާޒިމާ ވިދާޅުވީ ބަންޑާރަ ނާއިބުގެ އޮފީހުން ޝަރީއަތަށް ދެއްވާފައިވާ ޖަވާބާއި ރައްޔިތުންގެ މަޖިލީހުގެ ސްޓޭންޑްގައި ހިލާފުތަކެއް ހުރިއިރު، ބަންޑާރަ ނާއިބުގެ އޮފީހުން ރައްޔިތުންގެ މަޖިލިސް ތަމްސީލްކުރާނެ ގޮތް ނުވިސްނޭ ކަމަށެވެ.
ހަމަ އެހެންމެ ރައްޔިތުންގެ މަޖިލީހަކީ ދައުލަތުގެ އެއް ބާރު ކަމަށާއި ބަންޑާރަ ނައިބަކީ މުއައްސަސާއެއް ކަމަށާއި ދައުލަތުގެ މުއައްސަސާއަކުން ޤާނޫނު އަސާސީއާއި ޤާނޫނަކާ ހިލާފުވާ ގޮތަށް ޤާނޫނެއް ގަވާއިދެއް މާނަ ކުރާނަމަ ކުރިއާލާ ވެސް ފިޔަވަޅު އަޅަން ޖެހޭނެ ކަމަށް އާޒިމާ ވަނީ ވިދާޅުވެފައެވެ.
މީގެ އިތުރުން އާޒިމާ ވިދާޅުވީ، މަޖިލީހުގެ ރައީސްގެ އިތުބާރު ނެތް މައްސަލައެއްގައި ރިޔާސަތުގައި ހުންނަވަން ވާނީ ނައިބު ރައީސް ކަމަށް މަޖިލީހުގެ ގަވާއިދުގެ 205 ވަނަ މާއްދާގައި ބުނެފައި އޮތް ނަމަވެސް، ނައިބު ރައީސަށް ރިޔާސަތު ނުބެލެހެއްޓެވޭ ނަމަ އަމަލު ކުރާނެ ގޮތް 44 ވަނަ މާއްދާގައި ބަޔާންކޮށްފައިވާ ކަމަށެވެ.
