ފްލެޓު ދޫކުރުމުގައި އެއްވެސް އިހުމާލެއް ނުވަން: ޕްލޭނިން މިނިސްޓްރީ

ބިންވެރިޔާ ސްކީމްގެ ދަށުން ފްލެޓު ދޫކުރުމުގައި ޕްލޭނިން މިނިސްޓްރީގެ އިހުމާލުން އެއްވެސް ކަމެއް ކޮށްފައި ނުވާނެ ކަމަށް އެ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.

Ads by MWSC

އޭނާ މިފަދައިން ވިދާޅުވީ މިހާރު ޕްލޭނިން މިނިސްޓްރީގައި ކުރިއަށްދާ ނޫސްވެރިންގެ ބައްދަލުވުގައެވެ.

ރައީސް އިބްރާހީމް މުޙައްމަދު ޞާލިޙުގެ ސަރުކާރުގެ ”ގެދޮރުވެރިޔާ“ ސްކީމްގެ ދަށުން ފްލެޓު ލިބުނު 4،000 މީހުންގެ ދާއިމީ ލިސްޓު އާއްމު ކުރުމުން، ބޭ އިންސާފުން ޕޮއިންޓު ދީފައި ހުރިކަން ފާހަގަކޮށް އެތައް ބަޔަކު އަންނަނީ ނުރުހުން ފާޅު ކުރަމުންނެވެ.

ސަރުކާރުގެ ނުފޫޒު ގަދަ ފަރާތްތަކަށާއި، އެ ފަރާތްތަކުގެ އާޢިލާގެ މެމްބަރުންނަށް ފްލެޓްތައް ބަހައިލިކަން ވެސް ރައްޔިތުން ދަނީ ފާހަގަކުރަމުންނެވެ. އިއްޔެ ޕްލޭނިން މިނިސްޓްރީއަށް ގޮސް ރައްޔިތުން އިހުތިޖާޖު ކުރުމުން އެންޓި ކޮރަޕްޝަން ކޮމިޝަން(އޭސީސީ) އިން މިނިސްޓްރީއަށް ގޮސް މިކަމުގެ ތަޙުޤީގެއް ވެސް ހިންގަން ފެށިއެވެ.

އަކްރަމް ވިދާޅުވީ އޭސީސީ އިން އެދުނު ހުރިހައި އެއްޗެއް ވެސް ދައްކައިފައިވާނެ ކަމަށާއި، ފޮރުވާނެ އެއްޗެއް ނެތް ކަމަށެވެ. އަދި މިނިސްޓްރީއަށް ވަޑައިގެންނެވި އެ ކޮމިޝަނުގެ ބޭފުޅުން ތިއްބެވީ ހިތްހަމަޖެހިވަޑައިގެން ކަމުގައި ވެސް ވިދާޅުވިއެވެ.

އަދި ސަރުކާރުން ފްލެޓް ދޫކުރި ގޮތާއިމެދު އައު ސަރުކާރުން ބަލާނެ ކަމެއް ނޯންނާނެ ކަމަށާއި، އެޅޭނެ ފިޔަވަޅެއް ނޯންނާނެ ކަމަށް ވެސް އަކްރަމް ވިދާޅުވިއެވެ.