ފެލިދޫ ކައުންސިލްގެ ނިންމުން ބަދަލުކޮށްފި
ވ. ފެލިދޫ ކައުންސިލަށް ފައިސާ ދައްކަންޖެހޭ ފަރާތްތަކުން ފައިސާ ނުދައްކާނަމަ އެ މީހުންގެ އަނބިން، ފިރިން އަދި ދަރިންނަށް އެ ރަށު ކައުންސިލުން އެއްވެސް ޚިދުމަތެއް ނުދިނުމަށް ނިންމި ނިންމުން ބަދަލުކޮށްފިއެވެ.
އެގޮތުން މިކަން ހާމަކޮށް ފެލިދޫ ކައުންސިިލުން މިއަދު ކުރި އިއުލާނެއްގައި ބުނީ ކައުންސިލްގެ 29 ވަނަ ޖަލްސާއިން ނިންމި ނިންމުން މުރާޖައާކޮށްފައިވާ ކަމަށެވެ.
ހަމަ އެހެންމެ ކައުންސިލަށް ދައްކަންޖެހޭ ފައިސާ ނުދައްކާ މީހުންގެ އަނބިން، ފިރިން އަދި ދަރިންނަށް ޚިދުމަތްދޭން މިހާރު ނިންމާފައިވާ ކަމަށެވެ.
ނަމަވެސް ކައުންސިލަށް ފައިސާ ނުދައްކާ ފަރާތްތަކަށް ތިން މަސް ދުވަހުގެ މުއްދަތެއް ދިނުމަށްފަހު އެ މީހުންގެ ނަންތައް އާންމުކޮށް އިއުލާނު ކުރަމުން ގެންދިއުމަށް ނިންމާފައިވާ ކަމަށްވެސް އެ ކައުންސިލުން ބުނެފައި ވެއެވެ.
ފެލިދޫ ކައުންސިލަށް ފައިސާ ދައްކަންޖެހޭ ފަރާތްތަކުން އެ ފައިސާ ނުދައްކާނަމަ އެ މީހުންނާއި އެ މީހުންގެ އަނބިން، ފިރިން އަދި ދަރިންނަށް ކައުންސިލުން އެއްވެސް ޚިދުމަތެއް ނުދިނުމަށް އެ ރަށު ކައުންސިލުގެ 29 ވަނަ ޖަލްސާއިން ވަނީ ނިންމާފައެވެ. އެ ކައުންސިލުގެ މި ނިންމުމާއެކު ލޯކަލް ގަވަމަންޓް އޮތޯރިޓީން ވަނީ އެކަން ބަލަން ފަށާފައެވެ. އަދި ފެލިދޫ ކައުންސިލްގެ އެ ނިންމުން ބާތިލުކުރުމަށް ގޮވާލާ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ވަނީ ބަޔާނެއް ނެރެފައެވެ.
