ދިވެހީންގެ ރާއްޖެއެއް ބިނާ ކުރުމަށް އެންމެ ޤާބިލު ބޭފުޅަކީ މުޢިއްޒު ކަމަށް ދިވެހީން މިވަނީ ނިންމައިފައި: ޢަބްދުއްރަޙީމް

ދިވެހީންގެ ރާއްޖެއެއް ބިނާ ކުރުމަށް، މި ވަގުތު އެންމެ ޤާބިލު ބޭފުޅަކަށް ހުންނެވީ އިންތިޚާބީ ރައީީސް ޑރ.މުޙައްމަދު މުޢިއްޒު ކަމަށް ދިވެހި ރައްޔިތުން ނިންމައިފައިވާ ކަމަށް ޕީއެންސީގެ ޗެއާޕާސަން ޢަބްދުއްރަޙީމް ވިދާޅުވެއްޖެއެވެ.

Ads by STELCO

ފޭސްބުކްގައި މިރޭ ކުރައްވައިފައިވާ ޕޯސްޓެއްގައި ޢަބްދުއްރަޙީމް މިހެން ވިދާޅުވީ، އެމަނިކުފާނު ސަރުކާރެއް އެކުލަވައިލައްވަނީ ރެއާއި ދުވާލު ވެސް މަސައްކަތް ކުރުމަށް ކަމަށާއި، ފުރަތަމަ ހަފްތާ އިން ވެސް ތަފާތު ފެންނާނެ ކަމަށް ޑރ.މުޢިއްޒު ވިދާޅުވުމާއި ގުޅިގެންނެވެ.

އަބްދުއްރަޙީމް ވިދާޅުވީ މި އަހަރުގެ ޖުމްހޫރީ ދުވަހާއި ދިވެހީން ކުރިމަތިލީ އިރު މިވަނީ ދިވެހީންގެ ރާއްޖެއަކަށް އަލިވިލުމުގެ މަގުމަތީގައި ކަމަށާއި، ރައީސް ޑރ.މުޙައްމަދު މުޢިއްޒާއެކު މި މަހުގެ 17 ވަނަ ދުވަހު ދިވެހީން މި ފަށަނީ ދިވެހީންގެ ރާއްޖެއެއް ބިނާކުރުމުގެ މަސައްކަތް ކަމަށެވެ.

"ރައީސް ޑރ.މުއިއްޒު ފުރަތަމަ ދުވަހު ވެސް އަމާޒު ހިއްޕަވާނީ ފުރިހަމަ މިނިވަން މުސްތަގިއްލު އަދި ފުރިހަމައަށް ސިޔާދަތީ ބާރު ލިބިގެންވާ ރާއްޖެއަކަށް ދިވެހީންގެ ރާއްޖެ ހައްދަވާށެވެ. ދިވެހީންގެ ކަންކަން ނިންމާނީ ދިވެހީން ބޭނުންވާގޮތަށް ދިވެހީންކަން ކަށަވަރުކޮށް ދެއްވާށެވެ. ފުދުންތެރި ރައްޔިތެއް ދިރިއުޅޭ،އަމާންކަން ގާއިމުވެފައިވާ، ސުލްހަވެރި ދިވެހީންގެ ރާއްޖެއެއް ބިނާ ކުރެއްވުމަށެވެ. ތަފާތު ކުރުމަކާނުލާ ހަމަ ހަމަ ކަމާއެކު ނުފޫޒެއްނެތި އިންސާފު ޤާއިމުކޮށް ދެއްވުމަށެވެ." އޭނާ ވިދާޅުވިއެވެ.

މާތްވެގެންވާ އިސްލާމް ދީނަށް ދިވެހީންގެ ހިތްތަކުގައި ލޯބިޖައްސައި، އިސްލާމީ ރިވެތި އަޚްލާގާއި ސުލޫކުން ޒީނަތްތެރިވެފައިވާ މުޖުތަމަޢަކަށް ދިވެހީންގެ ރާއްޖޭގެ މުޖުތަމަޢު ހެއްދެވުމާއި، ޤައުމިއްޔަތު ދިރުވާ އާލާކޮށް ދިވެހީންގެ ހިތްތަކުގައި ޤައުމީ ރޫޙާއި ޖޯޝް އުފެއްދެވުމުގެ މަސައްކަތް ވެސް ޑރ.މުޢިއްޒު ކުރައްވަވާނެ ކަމަށް އޭނާ ވިދާޅުވިއެވެ.

އަދި ޤައުމު ދެކެ ލޯބިވާ ތަޢުލީމީ ޖީލެއް ބިނާ ކުރުމާއި، އިޖުތިމާޢީ ހަމަ ޖެހުމާއެކު، އިގްތިޞާދީ އަދި ޢުމްރާނީ ތަރައްޤީގެ މުޅިން އައު ޒަމާނަކަށް ދިވެހީންގެ ރާއްޖެ ގެންދެވުމާއި، ރައްޔިތުންގެ ހުރި ކަންބޮޑުވުންތަކަށް ހައްލު ހޯއްދަވައި ދެއްވާ އުފާ ފާގަތި މާހައުލެއް ޤާއިމުކޮށް ދެއްވާނެ ކަމަށް ވެސް ޢަބްދުއްރަޙީމް ވިދާޅުވިއެވެ.

އޭނާ ވިދާޅުވީ އިންތިޚާބީ ރައީސް ޑރ.މުޢިއްޒާ މެދު ދިވެހީންގެ އިތުބާރު އޮތްކަން ނިމިދިޔަ ރިޔާސީ އިންތިޚާބުން ސާފުކޮށް ފެންނަން އެބައޮތް ކަމަށެވެ.

"ރައީސް ޑރ.މުޢިއްޒު އަކީ ޢިލްމީ ޤާބިލު، ތަޖުރިބާކާރު ހިންގުންތެރި، ނަތީޖާ ނެރެދެއްވާފައިވާ ތެދުވެރި އިޚްލާޞްތެރި ބޭފުޅެކެވެ.ދިވެހީންގެ ރާއްޖެއެއް ދިވެހީން އެދެގޮތަށް ބިނާކުރުމަށް މިވަގުތު ރާއްޖޭގައި ހުރި އެންމެ ގާބިލް ބޭފުޅަކީ ރައީސް ޑރ.މުޢިއްޒުކަމަށް ދިވެހީން މި ވަނީ ނިންމާފައެވެ."

ދިވެހީންގެ ނިންމުމާ އެއްގޮތަށް ރައީސް ޑރ.މުޢިއްޒުއާއެކު ދިވެހީންގެ ރާއްޖޭގެ ކުރިމަގު ބިނާ ކުރުމަށް ހުރިހައި ދިވެހީން ތެދުވެރިކަމާއި ސާބިތުކަމާއެކު އެއްބާރުލުން ދިނުމަށް ޢަޒުމު ކަނޑައަޅަން ވެސް އޭނާ އެދިވަޑައިގެންނެވިއެވެ.