މުޢިއްޒު ފަދަ ބޭފުޅަކަށް ވެރިކަން ލިބުމަކީ ދިވެހީންގެ ނަސީބު، ފަސް އަހަރުން ޙާލަތު ބަދަލު ކުރައްވަވާނެ: ޒަމީރު
ރާއްޖޭގެ ޙާލަތު މިހައި ގޯސްވެފައި ވަނިކޮށް، އިންތިޚާބީ ރައީސް ޑރ.މުޙައްމަދު މުޢިއްޒު ފަދަ ބޭފުޅަކު ރާއްޖޭގެ ވެރިކަމާއި ޙަވާލުވެވަޑައިގެންނެވުމަކީ ދިވެހީންނަށް ލިބުނު ބޮޑު ނަސީބެއް ކަމަށް ޕީޕީއެމްގެ އެއް ނައިބު ރައީސް މޫސާ ޒަމީރު ވިދާޅުވެއްޖެއެވެ.
ޒަމީރަކީ ޕީޕީއެމްގެ ކުރީގެ ސަރުކާރުގައި ފަތުރުވެރިކަމާއިބެހޭ ވުޒާރާ ހިންގެވި އެއް ބޭފުޅާއެވެ. ޓީވީއެމްގައި ވާހަކަ ދައްކަވަމުން ޒަމީރު ވިދާޅުވީ މަސައްކަތުގެ މައިދާނުން ބައްދަލުވެވަޑައިގަތުމުގެ ކުރީން ވެސް އޭނާ މުޢިއްޒު ދެނެވަޑައިގަންނަވާ ކަމަށާއި، އެމަނިކުފާނަކީ ވަރަށް މަޑުމައިތިރި، ހެޔޮ ބޭފުޅެއް ކަމަށެވެ. އަދި ދުވަހަކު ވެސް އެމަނިކުފާނު ކޯފާ އިސްކުރައްވައިފައި ހުންނަވަނިކޮށް ފެނިވަޑައިގެންފައިނުވާ ކަމަށެވެ.
ރައީސް މުޢިއްޒުގެ ކެބިނެޓުގައި ވެސް ހިމެނިވަޑައިގަންނަވާނެ ކަމަށް ވަރަށް ބޮޑަށް ބެލެވޭ ޒަމީރު ވިދާޅުވި ގޮތުގައި، އިމާރާތް ކުރުމުގެ ދާއިރާ އިން ރާއްޖެ އިން އެންމެ މަތީ ތަޢުލީމު ހާސިލު ކުރައްވަވައިގެން ހުންނެވި މުޢިއްޒަކީ އެންމެ ޤާބިލު، އަދި އެ ފަދަ ދެވަނައެއް ނެތް ބޭފުޅެކެވެ.
"އަޅުގަނޑު ހަމަ، އެއްގޮތަކަށް ވެސް ޝައްކެއް ނުކުރާނަން، އިރާދަކުރެއްވިއްޔާ، އެމަނިކުފާނުގެ (ވެރިކަމުގެ) ފަސް އަހަރު ނިމިގެން ދެވަނަ ދައުރަކަށް ކުރިމަތިލައްވާއިރުގަ، ރާއްޖޭގެ ޙާލަތު، އަޅުގަނޑުމެން ރާއްޖޭގެ ރައްޔިތުން ބޭނުންވާ ގޮތަށް ބަދަލުވެފައި އޮންނާނެ ކަމަށް އަޅުގަނޑު ޤަބޫލު ކުރަނީ، އެއާ ދޭތެރޭ އަޅުގަނޑު އެއްވެސް ޝައްކެތް ނުކުރަން." މޫސާ ޒަމީރު ވިދާޅުވިއެވެ.
ރައީސް މުޢިއްޒު ހަތް އަހަރު ރާއްޖޭގެ ހައުސިން މިނިސްޓަރުކަމުގައި ހުންނެވިއިރު، ތަރައްޤީގެ ވަރަށް ގިނަ މަޝްރޫޢުތަކެއް އެމަނިކުފާނުގެ ބެއްލެވުމުގެ ދަށުން ކުރިއަށް ގެންދެވިއެވެ. އެކަން ފާހަގަކުރައްވައި ޒަމީރު ވަނީ ތަރައްޤީގެ އެންމެ ބޮޑެތި މަޝްރޫޢުތައް ހިންގުނީ މުޢިއްޒުގެ ބެއްލެވުމުގެ ދަށުން ކަމުގައި ވިދާޅުވެފައެވެ.
ކީއްކުރަން ފަސް އަހަރަށް ދައްމަންވީ! ފުރަތަމަ ދުވަހުން ތިކަން ކުރެވޭނެ މުއިއްޒުއަށް!