ރާއްޖެއަކީ ބޭރުގެ ސިފައިން ނެތްތަނަކަށް ހަދާނަން: ރައީސް ޑރ. މުޢިއްޒު
ދިވެހިރާއްޖެއަކީ ބޭރުގެ އެހެން އެއްވެސް ޤައުމެއްގެ ސިފައިން ނެތް ރާއްޖެއަކަށް ހަދާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ޑރ. މުޢިއްޒު މިހެން ވިދާޅުވެފައި ވަނީ ދިވެހިރާއްޖޭގެ ރައީސުލްޖުމްހޫރިއްޔާކަމުގެ ޤާނޫނީ ހުވާ ކުރެއްވުމަށްފަހު ޤައުމާ މުހާތަބު ކުރައްވާ ތަޤުރީރު ކުރައްވަމުންނެވެ.
އެގޮތުން ރައީސުލްޖުމްހޫރިއްޔާ ޑރ. މުޢިއްޒު ވިދާޅުވީ ދިވެހި ސަރުކާރުގެ ސިޔާސަތު ބިނާވާން ވާނީ، ދިވެހި ރައްޔިތުންނަށް އެންމެ މަސްލަހަތު ހުރި ގޮތުގެ މައްޗަށް ކަމަށެވެ.
ހަމަ އެހެންމެ އެހެން ޤައުމުތަކުގެ މިނިވަންކަމާއި، ސިޔާދަތީ އިމަށް، ދިވެހި ދައުލަތުން ފުރިހަމަޔަށް އިޙްތިރާމް ކުރައްވާނެ ކަމަށް ރައީސް މުޢިއްޒު ވިދާޅުވެފައި ވެއެވެ.
އެގޮތުން ދިވެހި ދައުލަތުގެ ސިޔާދަތީ އިން ރައްކާތެރި ކުރުމުގެ ޙައްޤު އޮންނަންވާނެ ކަމަށްވެސް ރައީސް ވަނީ ވިދާޅުވެފައެވެ. ރައީސް މުޢިއްޒު ވިދާޅުވީ އެ ޙައްޤު ނިގުޅައިގަންނާކަށް ފުރުޞަތެއް ނުދޭނެ ކަމަށާއި ދިވެހީންނަކީ މިނިވަންކަމުގެ ދަރީން ކަމަށެވެ.
ދޫނި އޭގެ ހާލި ބަލަހައްޓާ ފަދައިން، ދިވެހީން އަންނަނީ މި ލޮބުވެތި ދިވެހި ފަސްގަނޑު މިނިވަންކަންމަތީ، އެތައް ޒަމާނަކަށް ބަލަހައްޓަމުން ކަމަށް ރައީސް ޑރ. މުހައްމަދު މުޢިއްޒު ވިދާޅުވިއެވެ.
މިގޮތުން މިއީ ދިވެހީންގެ ނަފުސާއި ފުރާނައިގެ ނިންމުން ކަމަށާއި އެހެންކަމުން، އެ މަނިކުފާނު ރައްޔިތުންގެ އެ ނިންމުމަށް އަބަދުވެސް ކަމޭހިތާނެ ކަމަށް ވަނީ ވިދާޅުވެފައެވެ. މީގެ އިތުރުން ހިމޭން ރީތި މިންގަނޑުތަކުގެ އެހީގައި ދިވެހިރާއްޖެއަކީ ބޭރުގެ އެހެން އެއްވެސް ޤައުމެއްގެ ސިފައިން ނެތް ރާއްޖެއަކަށް ހަދާނެ ކަމަށް ރައީސް މުޢިއްޒު ވަނީ ވިދާޅުވެފައެވެ.
ރައީސް ޑރ. މުޢިއްޒު ވިދާޅުވީ ޤައުމީ ހައިސިއްޔަތުން ބަލާއިރު، ދިވެހި ޤައުމަށް ވަފާތެރި ވުމަށްވުރެ ބޮޑު އުފަލެއް އެ މަނިކުފާނަށް ނެތްކަން ދިވެހި ރައްޔިތުންނަށް ކަށަވަރުކޮށްދޭނެ ކަމަށެވެ.
