ތިނަދޫ އިސްލާމީ މަރުކަޒުގެ އިމާރާތް އައިއޫއެމްއާ ހަވާލުކޮށްފި
ގދ. ތިނަދޫގައި ހުންނަ އިސްލާމީ މަރުކަޒުގެ އިމާރާތް އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)ގެ ކޯސްތައް ހިންގުމަށް ހަވާލުކޮށްފިއެވެ.
އިސްލާމިކް މިނިސްޓްރީގެ ބެލުމުގެ ދަށުގައި ހުރި މި އިމާރާތް އައިޔޫއެމްގެ ކޯސްތައް ހިންގުމަށް އެ ޔުނިވަރސިޓީގައި ހަވާލުކޮށްފައިވަނީ, އައިޔޫއެމްގައި އޮތް ހާއްސަ ރަސްމިއްޔާތެއްގައެވެ. އެ މަރުކަޒު ހަވާލުކޮށްފައިވަނީ 10 އަހަރު ދުވަހުގެ މުއްދަތަކަށެވެ.
އިސްލާމިކް މިނިސްޓްރީގެ ފަރާތުން ސޮއިކުރެއްވީ އިސްލާމީ ކަންތައްތަކާ ބެހޭ މިނިސްޓަރު ޑރ. ޝަހީމް އަލީ ސައީދެވެ. އައިޔޫއެމްގެ ފަރާތުން ސޮއިކުރެއްވީ އެ ޔުނިވާސިޓީގެ ޗައިސް ޗާންސެލަރު އަލީ ޒާހިރެވެ.
އެ ރަސްމިއްޔާތުގައި ވާހަކަދައްކަވަމުން އަލީ ޒާހިރު ވިދާޅުވީ, މިއަދު ސޮއި ކުރެވުނު އެއްބަސްވުމާއެކު ތިނަދޫގައި އައިޔޫއެމްގެ އަމިއްލަ ތަނެއް ނެތުމުގެ ސަބަބުން ދިމާވާ ދަތިތަކަށް ހައްލު ލިބިގެންދާނެ ކަމަށެވެ.
އިސްލާމިކް މިނިސްޓަރު ޝަހީމް ދެއްކެވި ވާހަކަފުޅުގައި ވިދާޅުވީ, ރާއްޖޭގެ ކޮންމެ ރަށެއްގައި ވެސް އައިއޫއެމްގެ މަރުކަޒެއް ހުރުމަކީ މުހިންމު ކަމެއް ކަމަށެވެ. އެއީ އެތަނަކީ އިސްލާމީ ރިސާލަތު ދިރުވާ ތަނެއް ކަމަށް ޝަހީމް ފާހަގަކުރެއްވިއެވެ.
ޑރ. ޝަހީމް އިތުރަށް ވިދާޅުވީ, މި ސަރުކާރުން އައިޔޫއެމްއާއެކު އަބަދުވެސް ގާތް ގުޅުމެއް ބާއްވާނެ ކަމަށާއި, އެތަން ތަރައްޤީ ކުރުމަކީ މިހާރުގެ ރައީސުލްޖުމްހޫރިއްޔާ ޑރ. މުޢިއްޒުގެ ވިސްނުންފުޅެއް ކަމަށެވެ. އަދި ރާއްޖޭގެ އައިޔޫއެމްއިން ބޭރުގެ ފަރާތްތައް ކިޔަވާ ދުވަހެއް އަންނަން އެދިވަޑައިގަންނަވާ ކަމަށާއި އެކަމަކީ ނުުރެވޭނެ ކަމެއް ނޫން ކަމަށް ވެސް ޝަހީމް ވިދާޅުވިއެވެ.
Ads by STO
