ރައީސް ޑރ. މުޢިއްޒު މާދަމާ ސައުދީއަށް ފުރާވަޑައިގަންނަވަނީ

ފުރަތަމަ ރަސްމީ ދަތުރުފުޅުގައި ރައީސް ޑރ. މުހައްމަދު މުއިއްޒު މާދަމާ ސައުދީ އަރަބިއްޔާއަށް ފުރާވަޑައިގަންނަވާ ގޮތަށް ހަމަޖެހިއްޖެއެވެ.

Ads by MWSC

މަޢުލޫމާތު ލިބިފައިވާ ގޮތުގައި ރައީސް ޑރ. މުޢިއްޒު ސައުދީއަށް ވަޑައިގަންނަވަނީ ތިން ދުވަހުގެ މުއްދަތަކަށެވެ.

މި ދަތުރުފުޅާއި ގުޅޭ އިތުރު ތަފްސީލެއް ރައީސް އޮފީހުން އަދި ހާމަކޮށްފައިނުވެއެވެ.

ރައީސް ޑރ. މުޢިއްޒު ސައުދީއަށް ފުރާވަޑައިގަންނަވާއިރު ދިވެހިރާއްޖެއާ ސަޢުދީ ޢަރަބިއްޔާއާ ދެމެދު ވިޔަފާރީގެ އެއްބަސްވުމެއްގައި ސޮއިކުރުމަށް ސަޢުދީ ޢަރަބިއްޔާގެ ވަޒީރުންގެ މަޖިލީހުން އިއްޔެ ވަނީ ނިންމާފައެވެ.

ސަޢުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް ރިޔާސަތު ބެލެހެއްޓެވި ބައްދަލުވުމެއްގެ މަޢުލޫމާތު ހާމަކުރަމުން، ސަޢޫދީ ޢަރަބިއްޔާގެ ޤައުމީ ނިއުސް އޭޖެންސީ "ވާސް" އިން މިއަދު ބުނެފައިވާ ގޮތުގައި، ވިޔަފާރީގެ މި އެއްބަސްވުމުގެ ފަހުމުނާމާގައި ސޮއިކުރުމުގެ މަޝްވަރާތައް ދިވެހިރާއްޖޭގެ އިކޮނޮމިކް ޑިވޮލޮޕްމަންޓް މިނިސްޓްރީއާއެކު ކުރިއަށް ގެންދަވާނީ ސަޢޫދީޢަރަބިއްޔާގެ އިކޮނޮމިކް މިނިސްޓަރު އަދި ފޮރިން އިންވެސްޓްމަންޓް އޮތޯރިޓީގެ ޗެއާމަންއެވެ. 

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، މަޤާމުގެ ޤާނޫނީ ހުވައިކުރައްވައި ރިޔާސީ އައު ދައުރަށް ފެށްޓެވުމުގެ ރަސްމިއްޔާތުގައި ބައިވެރިވެވަޑައިގަތުމަށް ސަޢުދީ ޢަރަބިއްޔާގެ ޚާއްޞަ މަންދޫބެއްގެ ގޮތުގައި އެ ޤައުމުގެ މިނިސްޓަރ އޮފް އިކޮނޮމީ އެންޑް ޕްލޭނިންގ، ފައިޞަލް ބިން ފާދިލް އަލްއިބްރާހީމް ވަނީ މި މަހު ދިވެހިރާއްޖެއަށް ރަސްމީ ދަތުރުފުޅެއްކުރައްވައިފައެވެ.

މި ދަތުރުފުޅުގައި، ނޮވެމްބަރުމަހުގެ 18 ވަނަދުވަހު، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒާ ބައްދަލުކުރައްވައި ސަޢޫދީ ޢަރަބިއްޔާގެ މިނިސްޓަރ އޮފް އިކޮނޮމީ އެންޑް ޕްލޭނިންގ، ފައިޞަލް ބިން ފާދިލް އަލްއިބްރާހީމް ކުރެއްވި މަޝްވަރާތަކުގައި ވިޔަފާރިއާ އިޤްތިޞާދުގެ ދާއިރާއާ އަދި އެނޫން ގިނަ ދާއިރާތަކަކުންވެސް ދެ ޤައުމުގެ ގުޅުން އިތުރަށް ބަދަހިކުރުމާމެދު ވަނީ މަޝްވަރާކުރައްވައިފައެވެ.