ސީޕީގެ މަޤާމަށް ޝުޖާޢު އައްޔަނު ކުރުމަށް ލަފާ ދީފި
ސީޕީގެ މަޤާމަށް ކުރިމަތިލާން ހުޅުވައިލި ފުރުޞަތު ހަމަވީ މިދިޔަ އަންގާރަ ދުވަހުއެވެ. އެ މުއްދަތު ހަމަވިއިރު، އެ މަޤާމަށް ކުރިމަތިލާފައިވަނީ ހަމައެކަނި އޭސީޕީ ޝުޖާޢުއާއި އޭސީޕީ އިސްމާއީލް ނަވީނެވެ.
އެ ދުވަހު، ދެ ބޭފުޅުންގެ ނަން މިނިސްޓްރީން ވަނީ ޕޮލިސް ބޯޑަށް ފޮނުއްވައިފައެވެ.
ޕޮލިސް ބޯޑުން އެ ނަން ދިރާސާކުރިއިރު، ޕޮލިސް ކޮމިޝަނަރަކަށް އައްޔަން ކުރާނެ ބޭފުޅަކު ކަނޑައަޅަން އެ ބޯޑުން ކުރިއްސުރެ އެކުލަވާލާފައިވާ ކްރައިޓީރިއާ އަށް ނަވީންގެ ޝަރުތު ހަމަނުވާ ކަމަށް މަޢުލޫމާތު ލިބެއެވެ.
ދެ ނަން ދިރާސާކުރުމަށް ފަހު ޕޮލިސް ބޯޑުން ނިންމީ ކޮމިޝަނަރުގެ މަގާމަށް ޝުޖާއު އައްޔަން ކުރަން، މިނިސްޓަރަށް ލަފާ އެރުވުމަށެވެ.
ފުލުހުންގެ ޤާނޫނުގައި ވަނީ ސީޕީގެ މަޤަަމަށް ކުރިމަތިލާ ފަރާތްތަކާ ޕޮލިސް ބޯޑުން އިންޓަވިއުކޮށް ގާބިލްކަން ވަޒަންކުރަންޖެހޭކަމަށާއި، އެ ފަރާތްތަކާ ގުޅޭ ގޮތުން ނޭޝަނަލް އިންޓެގްރިޓީ ކޮމިޝަނާއި ފުލުހުންގެ ޕްރޮފެޝަނަލް ސްޓޭންޑަޑްސް ކޮމާންޑްގެ ރިޕޯޓެއް ޕޮލިސް ބޯޑުން ހޯދަންޖެހޭ ކަމަށެވެ.
