ފުޓުބޯޅަދަނޑުގެ އަމަލީ މަސައްކަތާއެކު އަލިފުށި ޒުވާނުންގެ ފޮނި އުއްމީދުތަކުގައި ކުލަ ޖެހެން ފަށައިފި
ރ.އަލިފުށީގައި މަސައްކަތް ފަށާފައިވާ ޓާފު ދަނޑާއިއެކު އެރަށުގެ ޒުވާނުން ހުވަފެންތައް ހަގީގަތަކަށް ބަދަލު ވުމުގެ ކުލަވަރު ފެންނަން ފަށައިފިއެވެ.
ދެންއާއި ވާހަކަދައްކަވަމުން އަލިފުށި ކައުންސިލްގެ ނައިބު ރައީސް އަބްދުއްރަޙުމާން ޔޫސުފް ވިދާޅުވީ، ޓާފުގެ މަސައްކަތް މިހާރު ގާތްގަނޑަކަށް ނިމުމަކަށް އައިސްފައިވާ ކަމަށާއި،ދަނޑުގައި ފެންސު ޖެހުމުގެ ޢަމަލީ މަސައްކަތް މިހާރު ފެށިފައި ވާކަމަށެވެ.
ހަމައެހެންމެ ކުރިއަށް އޮތް 2 މަސް ތެރޭގައި ދަނޑުގެ މަސައްކަތް މުޅިން ނިންމައި ބޭނުން ކުރެވޭތޯ މަސައްކަތް ކުރާކަމަށްވެސް އަލިފުށި ކައުންސިލްގެ ނައިބު ވިދާޅުވިއެވެ
މިދަނޑުގެ ސަބް ބޭސް ގެ މަސައްކަތް ކޮށްފައިވަނީ “އާރުކޭއެލް” އާ ހަވާލު ކޮށްގެންނެވެ. އަދި މި ދަނޑުގައި ޓާފު އެޅުމުގެ މަސައްކަތް ކުރީ އަމިން ކޮންސްޓްރަކްޝަނުންނެވެ. އަދި މިހާރު މި ދަނޑުގެ ފެންސު ޖެހުމުގެ އަމަލީ މަސައްކަތް ކުރެވެމުން ދާއިރު މި މަސައްކަތް ކުރަމުން ދަނީ އަލިފުށީގެ ކުންފުންޏެއް ކަމަށްވާ މެޑޯޒް ކޯޕަރޭޝަނުންނެވެ.
އަލިފުށި ކައުންސިލް ގެ ނައިބު ރައީސް އަބްދުއްރަޙުމާން ޔޫސުފު ދެންއާއި ވާހަކަ ދައްކަވަމުން ވިދާޅުވީ އަލިފުށި ދާއިރާގެ މަޖިލިސް މެންބަރު މުޙައްމަދު ރަޝީދަށް އިޚްލާސްތެރިކަމާއެކު ޝުކުރު ދަންނަވާ ކަމަށާއި އަލިފުށީގައި ޓާފުދަނޑުގެ ގެ މަސައްކަތަށް މުޙައްމަދު ރަޝީދު (ބިގޭ) ކޮށްދެއްވާފައިވާ އެހީތެރިކަން ފާހަގަ ކުރައްވާ ކަމަށެވެ.
