ހަނިމާދޫ އާއި ޓްރިވެންޑްރަމްއާ ދެމެދު އަލުން ދަތުރުތައް ފަށަނީ
ގައުމީ އެއާލައިން މޯލްޑިވިއަންއިން، ހދ. ހަނިމާދޫ އެއާޕޯޓާއި އިންޑިއާގެ ޓްރިވެންޑްރަމްއާ ދެމެދު އަންނަ މަހު އަލުން ދަތުރުތައް ފެށުމަށް ނިންމައިފައިވާ ކަމަށް އައިލެންޑް އޭވިއޭޝަނުން ބުނެފިއެވެ.
މޯލްޑިވިއަން ހިންގާ އައިލެންޑު އޭވިއޭޝަނުން ހާމަކުރެއްވި ގޮތުގައި މިދަތުރުތައް އަލުން ފެށުމަށް ހަމަޖެހިފައިވަނީ އަންނަމަހުގެ 12 ވަނަ ދުވަހުކަމަށެވެ.
މި ދަތުރުތަކާއެކު، ރާއްޖޭގެ އުތުރުގެ އަތޮޅުތަކުގައި ދިރިއުޅޭ ފަރާތްތަކަށް ފަސޭހަތަކެއް ލިބި، އިޤްތިސާދީގޮތުންވެސް އެ ސަރަހައްދަށް ކުރިއެރުންތައް ލިބޭނެކަމަށް ވެސް އައިލެންޑް އޭވިއޭޝަނުން ވިދާޅުވިއެވެ.
ދަތުރުތައް އަލުން ފެށުމަށް ނިންމުމާއެކު ޓިކެޓު ބުކް ކުރުމުގެ ފުރުސަތު މިހާރުވަނީ ހުޅުވާލާފައެވެ. ވެބްސައިޓާއި، މޯބައިލް އެޕް އަދި ޓިކެޓިން އޮފީސްތަކުން ޓިކެޓު ބުކް ކުރެވޭނެއެވެ.
ހަނިމާދުއާއި ޓްރިވެންޑްރަމްއާ ދެމެދު ދަތުރުތައް އޮންނާނީ ހުކުރާއި ހޯމަ ދުވަހުގައެވެ. އައިލެންޑް އޭވިއޭޝަނުން ވިދާޅުވީ މި ދަތުރުތައް ކުރާނީ މޯލްޑިވިއަންގެ ޑޭޝް 8ގެ މަތިންދާ ބޯޓަކުން ކަމަށެވެ.
