ރެހި ހިމެނޭ ގޮތަށް، ދާ އަޅައިގެން 9 ބާވަތެއްގެ މަސް ބޭނުން މަނާކޮށްފި

އަމިއްލަ ބޭނުމަށް ކުރާ މަސްވެރިކަމުގައި، ދާ އަޅައިގެން، ނުވަ ބާވަތެއްގެ މަސް ހިފުން މަސްވެރިކަމުގެ އާއްމު ގަވާއިދުގެ ދަށުން މަނާކޮށްފިއެވެ.

Ads by STELCO

ގެޒެޓްގައި އާއްމުކޮށްފައިވާ، މަސްވެރިކަމުގެ ގާނޫނާއި، އެ ގާނޫނުގެ ދަށުން ހެދިފައިވާ ގަވާއިދުތަކާ ހިލާފުވާ ފަރާތްތަކާ މެދު އަޅާނެ ފިޔަވަޅުތަކުގެ ދަށުން ބުނެފައިވަނީ، ތިރީގައި އެވާ 9 ބާވަތުގެ މަސް،  އަމިއްލަ ބޭނުމަށް ކުރާ މަސްވެރިކަމުގައި، ދާ އަޅައިގެން، ނުވަ ބާވަތެއް ހިފުން މަނާ ކަމަށެވެ.

• ރެހި
• ބޯދި
• މުގުރާން
•  ހޮނޑެލި
•  މިޔަރެން
•  ނިލަމެހި
•  ތާވަޅު ނުވަތަ ތާވަޅަ
• މުށިމަސް

އެޤަވާއިދުގައި ބުނެފައިވަނީ، ދާ އަޅައިގެން ހިފުން މަނާ ބާވަތެއް ހިފައިފިނަމަ، އަދި ދާ ބޭނުންކުރަން ޖެހޭ ހަމަތަކާ ހިލާފަށް ދާ ބޭނުންކޮށްފި ނަމަ، 2000 ރުފިޔާއިން ޖޫރިމަނާ ކުރާނެ ކަމަށާއި އަދި ތަކުރާރުވާ ކޮންމެ ފަހަރަކު 500 ރުފިޔާ އިތުރު ކުރެވޭނެ ކަމަށާއި އެގޮތަށް ޖޫރިމަނާ އިތުރުކުރެވޭނީ 5000 ރުފިޔާ އާ ހަމައަށް ކަމަށް ބުނެފައިވެއެވެ.

އަދި ބުނެފައިވަނީ، އަމިއްލަ ބޭނުމަށް ކުރާ މަސްވެރިކަމުގައި ރަށްރަށުގެ ފަޅުގެ ސަރަހައްދުން ބޭރުގައި ދާ އަޅައިފިނަމަ 3500 ރުފިޔާއިން ޖޫރިމަނާ ކުރާއިރު ތަކުރާރުވާ ކޮންމެ ފަހަރަކު 500 ރުފިޔާ އިތުރު ކުރާ ގޮތަށާއި އެގޮތަށް ޖޫރިމަނާ އިތުރު ކުރެވޭނީ 5000 ރުފިޔާ އާ ހަމައަށް ކަމަށް ބަޔާންކޮށްފައި ވެެއެވެ.

މީގެ އިތުރުން އަމިއްލަ ބޭނުމަށް ކުރާ މަސްވެރިކަމުގައި ބޭނުންކުރާ ، ދާ 100 ފޫޓަށް ވުރެ ދިގުވެގެން ނުވާނެ ކަމަށާއި ބޭނުންކުރާ ދަލުގެ ގޮޅިތައް ހުންނަން ޖެހޭނެ އެންމެ ކުޑަ ސައިޒަކީ ހަތަރު އިންޗި ކަމަށްވެސް ޤަވާޢިދުގައި ބުނެފައިވެއެވެ.

އަދި މަސްވެރިކަން ކުރުމަށް ދާ އެޅުމަށް ފަހު، ދާ ދޫކޮށްލައިފައި ނުދިއުމަށާއި މަސްވެރިކަން ކުރުމަށް ދާ ބޭނުންކުރާއިރު ފަރަށް ގެއްލުން ލިބޭނެ ފަދަ އެއްވެސް ކަމެއް ނުކުރުމަށާއި ދެ ގަޑިއިރަށް ވުރެ ގިނައިރު ދާ ދަމާފައި ނުބޭއްވޭނެ ކަމަށް ވެސް ގަވާއިދުގައި ބުނެއެވެ.