ފުލުހުންގެ މުސާރަ 35 އިންސައްތަ ބޮޑުކޮށްފި
ފުލުހުންގެ މުސާރަ މި މަހުންގެ ފެށިގެން 35 އިންސައްތައަށް ބޮޑުކޮށްފިއެވެ.
އެކްސްގައި ކުރި ޕޯސްޓެއްގައި ޗީފް ސްޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ ފުލުހުންގެ މުސާރަ މި މަހުން ފެށިގެން 35 އިންސައްތަ ސަރުކާރުން ބޮޑުކޮށްފައިވާ ކަމަށެވެ.
އާ މުސާރައިގެ އޮނިގަނޑުގައި ހިމެނެނީ ބޭސިކް ސެލެރީގެ އިތުރުން، މަގާމުގެ އެލަވަންސް، ޖޮބް އެލަވަންސް އަދި ކުރާ މަސައްކަތާއި ގުޅޭގޮތުން ދެވޭ އެލަވަންސެއް ކަމަށް ޝިފާން ވިދާޅުވިއެވެ.
''މިއީ 2009 ވަނަ އަހަރުގެ ފަހުން އަސާސީ މުސާރާއާއި އެކު ފުލުހުންގެ މުސާރަ ބޮޑު ކުރެވުނު ފުރަތަމަ ފަހަރު. މުސާރަ އޮނިގަނޑު ޒަމާނީކޮށް ފުލުހުންކުރަމުންދާ މަސައްކަތްތަކާ ގުޅޭގޮތުން އެލަވަންސް ތަޢާރަފް ކުރުމުގެ ގޮތުން ކުރިންދެމުންއައި އެލަވަންސްތަކަށް ބަދަލުގެނެވިފައިވާނެ" އޭނާގެ ޕޯސްޓުގައި ވިދާޅުވިއެވެ.
ފުލުހުންނާއި ސިފައިންގެ މުސާރަ ބޮޑު ކުރާނެކަމަށް ރިޔާސީ އިންތިހާބުގެ ތެރޭގައި ވަނީ ވައުދުވެވަޑައިގެންފައެވެ.
