މި އަހަރުގެ މިހާތަނަށް 500،000 އަށްވުރެ ގިނަ ފަތުރުވެރިން އައިސްފި
މިއަހަރުގެ މިހާތަނަށް 500،000 އަށް ވުރެ ގިނަ ފަތުރުވެރިން ރާއްޖެއަށް ޒިޔާރާތްކޮށް، މި އަހަރަށް ކަނޑައެޅިފައިވާ ޓާގެޓުގެ 25 އިންސައްތަ ހާސިލްވެއްޖެއެވެ.
ޓޫރިޒަމް މިނިސްޓަރު އިބްރާހިމް ފައިސަލް މިއަދު އެކްސްގައި ކުރި ޕޯސްޓެއްގައި ވިދާޅުވީ، މިއަހަރަށް ކަނޑައެޅިފައިވާ ޓާގެޓުގެ 25 އިންސައްތަ ހީކުރިވަރަށް ވުރެ އަަވަހަށް ހާސިލްވެއްޖެ ކަމަށެވެ.
އަދި މި ކާމިޔާބީ އަކީ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުން ރާއްޖެ އިސްތިހާރުކުރުމަށާއި، މެހެމާންދާރީ އަދާކުރުމަށް ކުރަމުންދާ ބުރަ މަސައްކަތުގެ ނަތީޖާ ކަމަށް ފައިސަލް ވިދާޅުވިއެވެ.
ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާގޮތުން މިދިޔަ އަންގާރަ ދުވަހުގެ ނިޔަލަށް ރާއްޖެއަށް 524،339 ފަތުރުވެރިން ރާއްޖެއަށް ޒިޔާރާތް ކޮށްފައިވެއެވެ. އޭގެތެރެއިން، އެންމެ ގިނަ ފަތުރުވެރިން ޒިޔާރާތްކޮށް، ފަތުރުވެރިކަމުގެ މާކެޓުގެ އެއްވަނައިގައި އޮތީ ޗައިނާއެވެ. ދެވަނައަށް އެންމެ ގިނަ ފަތުރުވެރިން ޒިޔާރާތް ކޮށްފައިވަނީ ރަޝިއާއިންނެވެ. އަދި ތިންވަނައަށް އެންމެ ގިނަ ފަތުރުވެރިން ޒިޔާރާތްކޮށްފައިވަނީ އިޓަލީއިންނެވެ.
ޗައިނާއިން 61،410 ފަތުރުވެރިން ޒިޔާރާތް ކޮށްފައިވާއިރު، ރަޝިއާއިން 53،624 ފަތުރުވެރިން ޒިޔާރާތްކޮށްފައިވެއެވެ. އަދި އިޓަލީއިން 50،493 ފަތުރުވެރިން ޒިޔާރާތްކޮށްފައިވެއެވެ.
