ތިން ވަޒީރުން އަލުން އައްޔަން ކުރުމާއި ގުޅިގެން އިދިކޮޅުން ހުށަހެޅި ގަރާރު ބަލައިގަނެފި
17 ނޮވެމްބަރުގައި އައްޔަންކުރި ވަޒީރުންގެ ތެރެއިން މަޖިލީހުގެ ރުހުން ނުލިބުނު 3 ވަޒީރުންގެ ނަން އަލުން ފޮނުވި މައްސަލައާއި ގުޅިގެން ހުށަހެޅި ގަރާރު ރައްޔިތުންގެ މަޖިލީހުން ބަލައިގަނެފިއެވެ.
ރައްޔިތުންގެ މަޖިލީހުން މީގެ ކުރިން ރުހުން ނުދޭން ނިންމާފައިވާ 3 ވަޒީރުން އަލުން އެ މަގާމަށް އައްޔަންކުރުމުން، އެކަމާ ނުރުހުން ފާޅުކޮށް މަޖިލީހުގެ ތަޅުމަށް ގަރާރެއް ހުށަހަޅާފައިވަނީ ގަލޮޅު އުތުރު ދާއިރާގެ މެންބަރު އީވާ އަބްދުﷲއެވެ.
ބަންޑާރަ ނައިބު އަހުމަދު އުޝާމާއި، އިސްލާމީކަނއްތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދާއި، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޑރ. އަލީ ހައިދަރު އަލުން މަގާމަށް އައްޔަންކުރުމުން އެކަމާ ނުރުހުން ފާޅުކޮށް އީވާ މަޖިލީހަށް ހުށަހެޅި ގަރާރުގައި ބުނެފައިވަނީ، 3 ވަޒީރުން އަނެއްކާ މަގާމަށް އައްޔަންކޮށްފައިވަނީ، ގާނޫނު އަސާސީއާ ހިލާފަށްކަމަށެވެ.
އަދި، ރައްޔިތުންގެ މަޖިލީހުން ރުހުން ނުލިބޭ އެއްވެސް ވަޒީރަކަށް މަގާމުގައި ނުހުރެވޭނެކަމާއި، ރުހުން ނުލިބުނު ހިސާބުން އެ މީހަކު ހުރި މަގާމުން އެ މީހަކު ވަކިކުރަންޖެހޭނެކަމަށް ސުޕްރީމް ކޯޓުގެ ގަޒިއްޔާއަކާ ހަވާލާދީ އީވާގެ ގަރާރުގައި ފާހަގަކޮށްފައިވެއެވެ.
މި ގަރާރު މަޖިލީހަށް ބަލައިގަތުމާއި ގުޅޭގޮތުން ނެގި ވޯޓުގައި ބައިވެރިވެވަޑައިގެންނެވި 39 މެންބަރުންގެ ތެރެއިން 33 މެންބަރުން ވަނީ ގަރާރު ބަލައިގަތުމަށް ވޯޓު ދެއްވާފައެވެ. ގަރާރާއި ދެކޮޅަށް ވޯޓު ދެއްވީ 6 މެންބަރުންނެވެ.
