ލިބޭ ހުރިހާ ފުރުސަތެއްގައި ބަލަނީ ނަތިއްޖާ ނެރެވޭތޯ: ރައީސް
ރިޔާސީ އިންތިހާބުގެ ކެމްޕޭނުގައި ވައުދުވީ ފަދައިން، މިހާރުވެސް މަސައްކަތްކުރަމުން ދަނީ "ރިޒަލްޓް އޮރިއެންޓެޑް" ކޮށް ސަރުކާރު ހިންގަން ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
މާލޭގައި ބޭއްވި ތ. ކިނބިދޫ ދާއިރާއިން މަޖިލީހަށް ވާދަކުރައްވާ ޕީޕީއެމް/ޕީއެންސީ ކެނޑިޑޭޓް، އަލީ އަޝްރަގުގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ރައްޔިތުން ބޭނުންވަނީ، ރައްޔިތުން އެދޭ ގޮތަށް މަޝްރޫއުތައް ބާރު ސްޕީޑުގައި ގޮސް ނަތީޖާ ނެރެން ކަމަށެވެ.
އެކަން ފާހަގަކުރައްވާ ރައީސް ވިދާޅުވީ، މީގެ ކުރިން ވެސް ރައްޔިތުންނަށް ހިދުމަތްކުރަން ލިބުނު ފުރުސަތު ތަކުގައި ވެސް މަސައްކަތް ކުރީ ނަތީޖާ ނެރެން ކަމަށެވެ.
"ކުރީގައި އަޅުގަނޑަށް ރައްޔިތުންނަށް ހިދުމަތްކުރުމުގައި ލިބުން އެކި ކަހަލަ ޕްލެޓްފޯމްތަކުގައި، އެކި ކަހަލަ ފުރުސަތުތަކުގައި އަޅުގަނޑު މަސައްކަތް ކޮށްފައި ހުންނާނީ ނަތީޖާ ނެރެން،" ރައީސް ވިދާޅުވިއެވެ.
އިތުރަށް ރައީސް ވިދާޅުވީ، އެގޮތަށް ކަންކަން ވެގެން ދާނީ ސަރުކާރަށް އެއްބާރުލުން ދޭނެ ބަޔަކު މަޖިލީހުގައި ތިބެގެން ކަމަށެވެ. ރައްޔިތުންނަށް ބޭނުންވާ ކަންކަން ނުކޮށްދީ، އަމިއްލަ މަސްލަހަތު އިސްކުރާ ބަޔަކު މަޖިލީހުގައި ތިބޭނަމަ، ބޭނުންވާ ނަތީޖާ ނުނެރެވޭނެކަން ރައީސް ފާހަގަކުރެއްވިއެވެ.
ހުޅުމާލޭ ދެވަނަ ފިޔަވަހީގެ ހިޔާ ސަރަހައްދުގައި ރައްޔިތުންނާއި ބައްދަލު ކުރައްވާ ވާހަކަފުޅު ދައްކަމުން ބޭއްވި ޖަލްސާ ގައި ރައީސް ވަނީ ސަރުކާރުން މިހާރު ހިންގަމުންދާ މަޝްރޫއުތަކުގެ އަދާހަމަތަކާއި، ނަތީޖާތައް "ނަންބަރުތަކުން" ކިޔައިދެއްވާފައެވެ. އެގޮތުން ރައީސް ވިދާޅުވީ، މުޅި ޖުމްލަ މިސަރުކާރުން 527 މަޝްރޫއުއެއް ރާއްޖޭގެ އެކި ކަންކޮޅުތަކުގައި ހިނގަމުންދާ ކަމަށެވެ.
