ކާތަކެތި ހަދައިގެން ވިއްކުމުގެ ފުރުސަތު ދިވެހި ކަނބަލުންނަށް ދެއްވާ: ރީކޯ މޫސަ
ކާތަކެތި ހަދައިގެން ވިއްކުމުގެ ފުރުސަތު ދިވެހި ކަނބަލުންނަށް އަލުން ދެއްވުމަށް ރައްޔިތުން މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު ގޮވާލައްވައިފިއެވެ.
މިއަދު މޫސަ ކުރެއްވި ޓްވީޓެއްގައި ވިދާޅުވީ ހޮޓާތަކަށް ހެދިކާ ހަދައިގެން ކައިބޮއެ އުޅޭ އެތައް އާއިލާއެއް މާލޭގައި ވެސް އެ ވިޔަފާރި ކުރަމުން ދިޔަ ކަމަށެވެ. އެވިޔަފާރި ހުއްޓުނީ ރެސްޓޯރެންޓްތައް ހުޅުވައި ބިދޭސީން ގެނެސް އެތަނުގެ ބަދިގެ ތަކުގައި ހެދިކާ ހަދަން ފެށި ހިސާބުން ކަމުގައި ވެސް ރީކޯ ފާހަގަކުރެއްވިއެވެ. މި މޭރުމުން ވާހަކަފުޅު ދައްކަވާ ރީކޯ ވަނީ މިވަގުތު އަލުން ދިވެހި ކަނބަލުންނަށް އެ ފުރުސަތު ދެއްވުމަށް ގޮވާލައްވައިފައެވެ.
ރީކޯ މިހެން ވިދާޅުވެފައި މިވަނީ ވިޔަފާރި އުޞޫލުން ކާބޯތަކެތި ފޯރުކޮށްދޭ ފަރާތްތަކުން ޤަވާއިދުތަކާއި އެއްގޮތަށް ނަގަންޖެހޭ ހުއްދަތައް ނެގުމަށް ހެލްތް ޕްރޮޓެކްޝަން އެޖެންސީ އިން އަންގާފައިވަނިކޮށެވެ. ހަމަ އެހެންމެ ޤަވާއިދުން ހުއްދަ ނުނަގައި ވިޔަފާރި އުޞޫލުން ކާބޯތަކެތީގެ ޚިދުމަތް ދޭނަމަ އެފަރާތްތަކާމެދު ފިޔަވަޅު އަޅާނެކަމުގައި ވެސް އެޗްޕީއޭ އިން ވަނީ އަންގަވާފައެވެ.
ކޮވިޑް-19ގެ މި ހާލަތުގައި ކުދި އަދި މެދު ފަންތީގެ ވިޔަފާރިތަކަށް ވަނީ ނުހަނު އަސަރު ކޮށްފައެވެ. އެގޮތުން ގިނަ ވިޔަފާރިތަކެއް މިހާރު ވެސް ވަނީ ހުއްޓާލައިފައެވެ. ގިނަ އަދަދެއްގެ މީހުންނަށް މި ހާލަތުގައި ވަނީ ވަޒީފާވެސް ގެއްލިފައިކަން ފާހަގަ ކުރެވެއެވެ. ކަން މިހެން އޮތްއިރު ގަވާއިދުތައް މަދުކޮށް ރައްޔިތުންނަށް އާމްދަނީ ލިބޭނެ މަގުތައް ތަނަވަސް ކޮށްދިނުމަށް ގިނަ ބަޔަކު އަންނަނީ ގޮވާލަމުންނެވެ.ނަމަވެސް ފެންނަނީ އެހެން މަންޒަރެކެވެ. ވަޒީފާގެއްލުމުން ގިބަ ބަޔަކު އޮންލައިންކޮށް ވެސް ކާބޯތަކެތީގެ ޚިދުމަތް ފޯރުކޮށްދެމުން ދާއިރު ޤަވާއިދުން ރަޖިސްޓްރީ ކުރަން މަޖުބޫރު ކުރުމުން ގިނަ ބަޔަކަށް އެ މަގުތައް ވެސް ދަނީ ބަންދު ވަމުންނެވެ.
