ރައްޔިތުންގެ މަޖިލީހުގެ ޖަލްސާއެއް އާދީއްތަ ދުވަހު
ރައްޔިތުންގެ މަޖިލީހުގެ ޖަލްސާއެއް ބޭއްވުމަށް ނިންމައިފިއެވެ.
އާދީއްތަ ދުވަހު ބޭއްވުމަށް ނިންމާފައިވާ މިޖަލްސާގައި މުހިންމު ކަންތައްތަކެއް ވަނީ އެޖެންޑާ ކޮށްފައެވެ.
އެގޮތުން ޓޫރިޒަމް މިނިސްޓަރު ކަމަށް އައްޔަނު ކޮށްފައިވާ ޑރ. އަބްދުﷲ މައުސޫމަށް ރުހުން ދިނުމާއި ސުޕްރީމް ކޯޓުގެ ފަނޑިޔާރު ކަމަށް އައްޔަނު ކުރެއްވުމަށް ރައީސް އިބްރާހިމް މުހައްމަދު ޞާލިހު ޖޭއެސްސީއަށް ހުށަހެޅުއްވި ދެ ބޭފުޅުން ކަމުގައިވާ ޑރ. މުހައްމަދު އިބްރާހިމާއި، އަލްއުސްތާޒު އަލީ ރަޝީދު ހުސައިން އައްޔަނުކުރުމާއި މެދުވެސް މަޖިލީހުން ގޮތެއް ނިންމުމަށް އެދުވަހަށް ވަނީ އެޖެންޑާކޮށްފަ އެވެ.
ޖުމްލަ 15 ކަމަކަށް ވޯޓަށް އެހުމަށް އާދީއްތަ ދުވަހު ބޭއްވޭ މިޖަލްސާގައި އެޖެންޑާ ކޮށްފައިވެއެވެ.
އޭގެތެރޭގައި ހިއުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރުސީއެމް) އަށް މެމްބަރުން އައްޔަނު ކުރުމަށް ރުހުން ދިނުމާއި، ތަޢުލީމުގެ ބިލަށްވެސް ވޯޓަށް އެހުން ހިމެނެއެވެ.
ރަައްޔިތުންގެ މަޖިލީހުގެ މިދައުރުގެ އެންމެ ފަހު ޖަލްސާ 31 އޮގަސްޓު ވީ ހޯމަ ދުވަހު ބޭއްވުމަށް، މިދިޔަ މަހު 26 ގައި ބޭއްވި ޖަލްސާގައި ނިންމެވިއެވެ.
