ގޮޓަބަޔަ ފިއްލަވަން ރައީސް ޞާލިހުގެ ސަރުކާރުން އެހީތެރިވި: ނަޝީދު
ސްރީލަންކާގެ މަސްރަހު ވަރަށް ބޮޑަށް ހޫނުވެގެން ދިޔަ ދުވަސްވަރު އެގައުމުގެ އޭރުގެ ރައީސް ގޮޓަބަޔަ ރާޖަބަކްސަ ފިއްލަވަން ރައީސް އިބްރާހިމް މުހައްމަދު ޞާލިހުގެ ސަރުކާރު މެދުވެރިކޮށް އެހީތެރިކަން ފޯރުކޮށްދިންކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ކޮވިޑް-19 އަށްފަހު ސްރީލަންކާ ބަނގުރޫޓުވެފައި އޮއްވާ ސަރުކާރުގެ ކޮރަޕްޝަން އެތައް މައްސަލަތަކެއް ފެންމަތިވެ މުޅި ގައުމު ހަލަބޮލިކޮށްލި އެވެ. 2022 ވަނަ އަހަރުގެ ޖޫން މަހުގެ ތެރޭގައި ލަންކާގެ އެތައް ރައްޔިތުންނެއް މަގުތަކަށް ނިކުމެ ސަރުކާރު އިމާރާތްތަކާއި ވެރިންގެ ގެދޮރުގައި ހުޅުވެސް ޖެހި އެވެ.
މައްސަލަ ވަރަށް ބޮޑަށް ހޫނުވެފައިވަނިކޮށް އެގައުމުގެ ރައީސް ގޮޓަބަޔަ ރާޖަޕަކްސަ ކުއްލިއަކަށް ލަންކާއިން ފިއްލެވި އެވެ. އޭނާ ރާއްޖެ ވަޑައިގެން ރާއްޖޭގައި ހުންނެވުމަށްފަހު ދެން ވަޑައިގެންނެވީ ހިމާޔަތް ހޯއްދަވައިގެން ސިންގަޕޫރަށެވެ.
ގޮޓަބަޔަ ރާއްޖެ ވަޑައިގެންނެވުމާއެކު ލަންކާ ރައްޔިތުންގެ ވަރަށް ބޮޑު ފާޑުކިޔުންތަކެއް ދިވެހި ސަރުކާރަށް އަމާޒުވި އެވެ. އެހެންނަމަވެސް އޭރު ރައީސް ޞާލިހުގެ ސަރުކާރުން ބުނީ ގޮޓަބަޔަ ރާއްޖެ ވަޑައިގެންނެވީ ޓްރާންސިޓް ދަތުރެއްގައި ކަމަށެވެ. ގޮޓަބަޔަ ރައީސްކަމުން އިސްތިއުފާ ދެއްވީ ސިންގަޕޫރަށް ވަޑައިގެންނެވުމަށްފަހު އެވެ.
ލަންކާގެ ނޫހަކަށް މިއަދު ދެއްވި ބަސްތީގަތުމެއްގައި ރައީސް ނަޝީދު ވަނީ މިކަމާއި ގުޅޭގޮތުން އިތުރު ތަފްސީލުތައް ހާމަކުރައްވައިފަ އެވެ. އެގޮތުން އެމަނިކުފާނު ވިދާޅުވީ "އަރަގަލަޔަ" މޫވްމެންޓުގެ ސަބަބުން ގޮޓަބަޔަގެ ފުރާނަފުޅަށް ގެއްލުންވުމުން އެގައުމުން ފިއްލެވުމަށް ދިވެހި ސަރުކާރު މެދުވެރިކޮށް ރައީސް ނަޝީދު ފެސިލިޓޭޓް ކޮށްދެއްވި ކަމަށެވެ.
"އަޅުގަނޑުގެ ވިސްނުމުގައި، ޙާލަތު ރަނގަޅުކުރުމަށްޓަކައި، އަޅުގަނޑަށް ކުރެވުނު އެންމެ ރަނގަޅު ކަމަކީ، އޭނާ ފުރައިގެން ދިއުމަށް މަގުފަހިކޮށްދިނުން. އެއާއެކު، އިސްތިއުފާ ދެއްވުމުގެ ފުރުސަތާއެކު، ސްރީލަންކާއަށް އެހެން ގޮތެއް ހޯދުމުގެ ފުރުޞަތު ހުޅުވައިދިނުން. ލޭ އޮހޮރުވުމެއް ނެތި ލަންކާގެ ރައްޔިތުންނަށް ސިޔާސީ ވަގުތުކޮޅެއް ދިނުން" ނަޝީދު ވިދާޅުވި އެވެ.
ގޮޓަބަޔަ ފިއްލަވަން ދިވެހި ސަރުކާރުން އެހީތެރިވެދިންކަމުގެ އަޑުތަކެއް 2022 ވަނަ އަހަރުވެސް ފެތުރުނެވެ. މިކަމާ ލަންކާ ރައްޔިތުން ރުޅިގަދަވެގެން ސޯޝަލް މީޑީއާގައިވެސް ހިޔާލު ފާޅުކުރި އެވެ. އެހެންނަމަވެސް ތުހުމަތުތައް ދިވެހި ސަރުކާރުން ދޮގުކުރުމުން މިވާހަކަތައް އޮބިގެން ދިޔަ އެވެ.
ރައީސް ނަޝީދު ވިދާޅުވި ގޮތުގައި ގޮޓަބަޔަގެ އިސްތިއުފާއަށް ސްރީލަންކާ ރައްޔިތުން ގޮވަމުން ދިޔަނަމަވެސް އެގައުމުގައި ހުންނަވައި އިސްތިއުފާ ދެއްވިނަމަ އޭނާގެ ފުރާނަޔަށް ގެއްލުން ވީހެވެ. އެހެންވެ ލަންކާ ދޫކުރައްވައި އެހެން ގައުމަކަށް ވަޑައިގެންނެވުން މުހިންމުކަމަށް ދެކެވަޑައިގަންނަވާތީ ރާއްޖެ މެދުވެރިވެގެން ގޮޓަބަޔަ ފިއްލެވުމުގެ އިންތިޒާމުތައް ހަމަޖެއްސީކަމަށް ރައީސް ނަޝީދު ވިދާޅުވި އެވެ.
"އަޅުގަނޑަކަށް ހިއެއް ނުވޭ އަޅުގަނޑު ދިޔައީ އާންމުންގެ (ލަންކާ ރައްޔިތުންގެ) ޝުޢޫރުތަކާ ހިލާފަށްހެންނެއް. އަޅުގަނޑުގެ ރާއްޖޭގެ ބައެއް ރައްޓެހިން އޭރު އަޅުގަނޑާ މެދު ރުޅިގަދަވި ނަމަވެސް އަޅުގަނޑަށް ހީވަނީ އެ އެންމެން މިހާރު ހަމައަކަށް އެޅިއްޖެހެން." ރައީސް ނަޝީދު ވިދާޅުވި އެވެ.
ގޮޓަބަޔަ ރާއްޖެ ވަޑައިގެންނެވީ ސިއްރުންނެވެ. އެހެންނަމަވެސް އެކަން ކަށަވަރުވީ ވެލާނާ އިންޓަނޭޝަނަލް އެއާޕޯޓުގައި މަސައްކަތްކުރާ ބައެއް މުވައްޒަފުންގެ ހެކި ބަހުންނެވެ. އެއާޕޯޓުގެ ސެކިއުރިޓީ ވަރުގަދަކޮށް ގޮޓަބަޔަ ރާއްޖެ ވަޑައިގެން އޭނާ މަޑުކުރެއްވީ ރިސޯޓެއްގަ އެވެ.
