ސިޑްސްގައި ރައީސް މުއިއްޒު އަދާކުރެއްވި ދައުރަށް ބާބެޑޯސްގެ ބޮޑުވަޒީރުގެ ތައުރީފު
ސްމޯލް އައިލެންޑް ޑިވެލޮޕިންގް ނޭޝަންސް، ސިޑްސްގައި ރައީސް ޑރ. މުހައްމަދު މުއިއްޒު ކުރެއްވި މަސައްކަތްޕުޅަށް ބާބެޑޯސްގެ ބޮޑުވަޒީރު މިއާ އަމޮރް މޮޓްލީ ތައުރީފު ކުރައްވައިފި އެވެ.
ތަރައްގީވަމުން އަންނަ ކުދި ޖަޒީރާ ގައުމުތަކުގެ ހަތަރުވަނަ ބައިނަލްއަގުވާމީ މަހާސިންތާގައި ބައިވެރިވެވަޑައިގެންނެވުމަށް އެންޓީގާ އެންޑް ބާބިޔުޑާއަށް ކުރެއްވި ދަތުރުފުޅު ނިންމަވައިލެއްވުމަށްފަހު ރާއްޖެއަށް އެނބުރިވަޑައިގަތުމަށް ފަށްޓަވާފައިވާ ދަތުރުފުޅުގައި ބާބެޑޯސްގައި ވަނީ ޓްރާންސިޓް ކުރައްވައިފަ އެވެ. އެއާއެކު ބާބެޑޯސްގެ ބޮޑުވަޒީރާއި އެ ގައުމުގެ ސަރުކާރުން ވަނީ ރައީސަށް ހާއްސަ މެހެމާންދާރީއެއް އަދާކުރައްވައިފަ އެވެ.
ބާބެޑޯސްގެ ގްރާންޓްލޭ އެޑަމްސް އިންޓަނޭޝަނަލް އެއާޕޯޓުން ރައީސް މުއިއްޒުއަށް މަރްޙަބާ ދެންނެވީ، ބާބެޑޯސްގެ އެކްޓިންގ މިނިސްޓަރ އޮފް ފޮރިންއެފެއާޒް އޮފް ފޮރިން އެންޑް ފޮރިން ޓްރޭޑް އަދި އެ ގައުމުގެ ރައްޔިތުންގެ މަޖިލީހުގެ އިއްޒަތްތެރި މެންބަރު، ސީ. ސަންދްރަވީ ހަޒްބަންޑްސް އާއި، ޗީފް އޮފް ޕްރޮޓޮކޯލް، މިސް ރެސާ ލޭން އެވެ.
ބާބެޑޯސްގެ ބޮޑުވަޒީރު، މިއާ އަމޮރް މޮޓްލީ ވަނީ ރައީސް މުއިއްޒުއަށް ފޯނުން ގުޅުއްވައި، ޓްރާންސިޓްކޮށް އެ ގައުމުގައި މަޑުކޮށްލެއްވީތީ މަރްހަބާއާއި ޝުކުރު ދަންނަވައިފަ އެވެ. ބޮޑުވަޒީރާއި އެ ގައުމުގެ ސަރުކާރުގެ ފަރާތުން އަދާކުރެއްވި ހާއްސަ މެހެމާންދާރީ އަބަދުވެސް ހަނދުމަފުޅު ހުންނާނޭކަމުގައި ވިދާޅުވެފައިވެ އެވެ.
ސިޑްގައި ދެބޭފުޅުންގެވެސް އަވަދިނެތިވެ އަދި ވަރަށް ބުރަކޮށް އުޅުއްވަން ޖެހިވަޑައިގަތުމުގެ ސަބަބުން މިދިޔަ އަންގާރަ ދުވަހަށް ތާވަލްކޮށްފައިވާ ބައްދަލުވުމަށް ފުރުސަތު ނުލިބުނު ނަމަވެސް ވަރަށް އަވަހަށް ދެބޭފުޅުން ބައްދަލުވާނޭކަމަށް އުއްމީދު ކުރައްވާކަމަށް ރައީސް ވަނީ ވިދާޅުވެފަ އެވެ.
ރައީސްގެ މެސެޖު ނިންމަވާލައްވާފައިވަނީ، "ސިޑްސް" ގެ 4 ވަނަ މަހާސިންތާގައި، ބައިނަލްއަގުވާމީ މާލީ އެހީތެރިކަމުގެ ނިޒާމު އިސްލާޙުކޮށް، ކުދި ޖަޒީރާ ގައުމުތަކަށް ވެދޭ މާލީ އެހީ އިތުރުކުރުމަށް ބާރުއަޅުއްވައި ބާބެޑޯސްގެ ބޮޑުވަޒީރު ކުރެއްވި މަސައްކަތްޕުޅު ހާއްސަގޮތެއްގައި ފާހަގަކުރެއްވުމާއިއެކު އެވެ. އަދި އެކަމަނާގެ އެ މަސައްކަތްޕުޅުގެ ސަބަބުން ވަރަށް ބޮޑު ހިތްވަރެއް ލިބިވަޑައިގެންނެވިކަމުގައި ވިދާޅުވެ، ރާއްޖެއިންވެސް ވަކާލާތުކުރާ އެންމެ މުހިންމު އެއްކަމަކީ މިއީ ކަން ރައީސް ފާހަގަކުރެއްވި އެވެ.
