ދިވެހި ކެޔުމާއެކު މިފަހަރު މަދީނާއާއި މިނާގައި ވެސް ދިވެހި ވަންތަ އިންތިޒާމުތަކެއް
އެހެން އަހަރުތަކާ ހިލާފަށް މިއަހަރުގެ ހައްޖުގައި މިނާއާއި މަދީނާގައި ވެސް ދިވެހި ހައްޖާޖީންނަށް ދިވެހިވަންތައް ކެއުމުގެ އިންތިޒާމުތައް ހަމަޖައްސާފައިވާނެ ކަމަށް ދިވެހި ހައްޖު މިޝަން އިން ބުނެފިއެވެ.
"ދެން" އަށް ދެއްވި އިންޓަވިއުއެއްގައި ހައްޖު ކޯޕަރޭޝަނުގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވީ, މީގެ ކުރިން މިނާގައި އަދި މަދީނާގައި އަޅުގަނޑުމެން ކެއިންބުއިމުގެ ކަންތައްތަކުގައި ހައްޖު މިޝަން އަށް މާ ބޮޑު ބާރެއް ނޯންނަ ކަމަށެވެ.
ނަމަވެސް ގިނަ މަޝްވަރާތަކަކާއެކު އެ ކަން މިހާރު ބަދަލުކުރެވިފައިވާ ކަމަށް އޭނާ ވިދާޅުވި އެވެ.
"މި ފަހަރު އަޅުގަނޑުމެން މަޝްވަރާ ކޮށްގެން މިނާގައި އަދި އަރަފާތު ކޭމްޕުތަކުގައި ވެސް އަދި މަދީނާގައި ވެސް ހާޖީންނަށް ދިވެހި ކެއުން އިންސާފުކުރުމުގެ ފުރުސަތު ޔަގީންވެގެން ދާނެ." ޝަކީލް ވިދާޅުވި އެވެ.
ހައްޖުގެ އެންމެ ފަހުގެ ތައްޔާރީތަކާ ގުޅޭ ގޮތުން ވާހަކަދައްކަވަމުން ޝަކީލް ވިދާޅުވީ މިހާރު ތައްޔާރީތައް ވަމުން ދަނީ މާދަމާ ހައްޖާޖީންގެ ފުރަތަމަ ގުރޫޕާއެކު ފޮނުވާލަން ޖެހޭ ލަގެޖުތައް ރީޗެކިންއަށް ކަމަށާއި ހާޖީންގެ ލަގެޖުތައް މާލެއިން ހުޅުމާލެއިން އަދި ވިލިމާލެއިން ވެސް ކަލެކްޓުކުރުމުގެ މަސައްކަތް ކުރަމުންދާ ކަމަށެވެ.
"ލަގެޖުތައް އެއް ދުވަސްކުރިން އެއާޕޯޓަށް ގެންގޮސް ޗެކިން ކަންތައްތައް ނިންމާލާނަން. މިކަމަކީ ވެސް ހަމަ ހާޖީންނަށް ފަސޭހަ ކުރުމަށްޓަކައި އިންތިޒާމްކޮށްގެން އަޅުގަނޑުމެން ކުރާ ތަންތައްތަކެއް." ޝަކީލް ވިދާޅުވިއެވެ.
އެންމެ ފަހުގެ ތައްޔާރީތަކުގައި ޙައްޖު ކޯޕަރޭޝަނުގެ މުވައްޒިފުން ހަރަކާތްތެރިވަނީ
ޝަކީލް ވިދާޅުވީ ފުރަން ހަމަޖެހިފައިވާ ގަޑިތައް ވެސް މިހާރު ހައްޖާޖީންނަށް އަންގާފައިވާނެ ކަމަށެވެ.
ހަތަރު ދުވަހެއްގެ މަތިން ހަތަރު ފްލައިޓެއްގައި ހައްޖާޖީން ފުރުމަށް ހަމަޖެހިފައިވާއިރު, އެއާޕޯޓާއި މާލޭގެ ޓްރެފިން ތޮއްޖެހުން އެކަށީގެންވާތީ ހާއްސަ އިންތިޒާމުތަކެއް ހަމަޖައްސާފައިވާ ކަމަށާއި އެމްއޭސީއެލާއި ފުލުހުން އެކަމުގައި ހަރަކާތްތެރިވާނެ ކަމަށް އޭނާ ވިދާޅުވި އެވެ.
މި ބޭފުޅުން ދެއްވާ އިރުޝާދުތަކަށް ކަމޭހިތަށް އަޅުގަނޑުމެން ވަރަށް ބޮޑަށް އެދެން. 298 ހާޖީންގެ އޭގެ ކޮންމެ ބޭފުޅަކާއެކީގައި ވެސް އާއިލާ ބޭފުޅުން ހަމަ އެއާޕޯޓަށް ވަޑައިގަންނަވާނެ. އެހެންވީމާ އެއާޕޯޓަށް ވަރަށް ބާރުބޮޑުވެގެންދާނެ." ޝަކީލް ވިދާޅުވި އެވެ.
ޝަކީލް ވިދާޅުވީ ސައުދީގައި ހައްޖު މިޝަންގެ އެޑްވާންސް ޓީމު ހަރަކާތްތެރިވަމުން އަންނަ ކަމަށާއި ހާޖީންނަށް ފުރިހަމައަށް މަރުހަބާ ކިޔުމަށްޓަކައި ސައުދީ އަރަބިއްޔާގައި ތިބި ޓީމުތައް ވަނީ ތައްޔާރުވެފައިވާ ކަމަށެވެ.
އެގޮތުން އެ ބޭފުޅުންގެ އެކޮމެޑޭޝަންގެ ކަންތަކާއި ދަތުރުފަތުރުގެ އިންތިޒާމުތައް ވެސް ހަމަޖައްސާފައިވާ ކަމަށް ޝަކީލް ވިދާޅުވިއެވެ.
Ads by STO
