އައިޔޫއެމްއިން އިމްތިހާން ހަދާ ހާފިޒުން އިތުރު އިމްތިހާނެއް ހަދަން ނުޖެހޭގޮތް ހަދައިފި
އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން ގުރުއާން ކިޔަވައި، އެ ޔުނިވާސިޓީއިން ހާފިޒް ކަމުގެ އިމްތިހާން ހަދާ ފަރާތްތަކަށް އިތުރު އިމްތިހާނެއް ދިނުމަކާ ނުލައި އެއީ ހާފިޒުންގެ ގޮތުގައި ބަލައިގަންނަ ގޮތަށް ހާފިޒުން އިމްތިހާނު ކުރުމުގެ އުސޫލަށް ބަދަލު ގެނެސްފިއެވެ.
މިދިޔަ ބުދަ ދުވަހު އެ އުސޫލަށް ބަދަލު ގެނައުމަށް ފަހު ގެޒެޓްގައި ވަނީ ޝާއިއު ކޮށްފައެވެ. އެ އުސޫލުގައި ބުނެފައިވާ ގޮތުން އައިޔޫއެމްއިން ކިޔަވާ ހާފިޒަކަށް ވުމުން އިތުރު އިމްތިހާނެއް ހަދާކަށް ނުޖެހެއެވެ.
މީގެ ކުރިން އުސޫލު ކަނޑައެޅިފައިވާ ގޮތުން، ގުރުއާން ސެންޓަރު ފިޔަވާ ކޮންމެ ތަނަކުން އިމްތިހާނު ހެދިކަމުގައި ވިޔަސް، އަލުން އިމްތިހާނު ހަދަން ޖެހެއެވެ.
މީގެ އިތުރުން، ގެނެވުނު އިސްލާހާއެކު ރަށްރަށުގައި ތިބެ ހާފިޒުންގެ ގޮތުގައި ތަމްރީނުވާ މީހުންނަށް ވެސް ލުއިތަކެއް ލިބިގެންދެއެވެ. އެގޮތުން މީގެ ކުރިން މުރާޖާ ކުރުމަށް މާލެ އަންނަން ޖެހުން ނިމުމަކަށް އައިސްފައިއެވެ.
އުސޫލަށް ގެނެވުނު ބަދަލާއެކު ރަށްރަށުގައި ތިބެ ދަސްކޮށްގެން ހާފިޒުންނަށްވާ ފަރާތްތަކުން މާލެ އަންނަން ޖެހެނީ ހަމައެކަނި އިމްތިހާނު ހެދުމަށެވެ.
އުސޫލަށް ގެނެވުނު މި ބަދަލަކީ، ހާފިޒުންނަށްވާ މީހުންނަށް ލިބުނު ލުޔަކަށް ވެގެންދާނެއެވެ.
