އަނިޔާ ދިން އެންމެ ފަރާތްތަކަށް މާފުކޮށްފިން، 18 އަހަރުގެ ޚިދުމަތް ފެންނަން ހުންނާތީވެ އުފާވެރިވޭ: ހިޝާން
ނުކުޅެދުންތެރިކަން ހުންނަ ކުދިންނަށާއި އަދި ހާލުގައި ޖެހިފައިވާ އެތައް އާއިލާއަކަށް އެހީތެރިކަމުގެ އަތެއް ފޯރުކޮށްދެމުން ދިޔަ ދަރުމަވެރިޔާ އަދި ކުރީގެ އޮނަރަރީ ޑިސްއެބިލިޓީ އެމްބެސެޑަރު އަހުމަދު ހިޝާނަށް ނުކުޅެދޭ ކުދިންނަށް ޖިންސީ ގޯނާ ކުރާ ކަމުގެ ތުހުމަތުތަކެއް ކުރެވެން ފެށީ މި އަހަރުގެ ކުރީ ކޮޅުގައެވެ.
މި ތުހުމަތުތަކާއެކު ހިޝާން ވަނީ ޑިސްއެބިލިޓީ އެމްބެސެޑަރު ކަމުގެ މަގާމުން ވެސް ވަކިކޮށްފައެވެ. އަދި ހިޝާނަށް މަގުމަތިން ބަޔަކު ބިރު ދެއްކި ކަމުގެ ޚަބަރުތަކެއް ވެސް ހަމަ އެދުވަސްވަރު ފެންމަތިވިއެވެ.
މިއަދު ހިޝާން ވަނީ އޭނާގެ ފޭސްބުކުގައި އަސަރުން ފުރިގެންވާ ޕޯސްޓެއް ކޮށްފައެވެ. އެގޮތުން އެ ޕޯސްޓުގައި ހިޝާން ބުނެފައިވަނީ އޭނާއަށް ވަނީ ނަފްސާނީ ގޮތުން އެތައް އަނިޔާތަކެއް ތަހައްމަލު ކުރަން ޖެހިފައިވާ ކަމަށެވެ. އަދި ބިރުވެރިކަމެއްގެ ތެރޭގައި ހުންނަން ޖެހިފައި ކަމަށެވެ.
މި ކަންކަން ފާހަގަ ކުރުމަށް ފަހު ހިޝާން އިތުރަށް ބުނެފައިވަނީ އޭނާ ގަބޫލު ކުރާ ގޮތުގައި މިއީ އޭނާއަށް ކުރިމަތިވި އިމްތިހާނެއް ކަމަށެވެ. އަދި އެއާއެކު އޭނާއަށް އަނިޔާދިން އެންމެހާ ފަރާތްތަކަށް މާފުކޮށްފައިވާ ކަމަށް ހިޝާން ވަނީ ބުނެފައެވެ. އަދި ހަމަ އެހެެންމެ އެ ފަރާތްތަކަށް ހެޔޮ ވިސްނުން ދެއްވުން އެދި ދުއާ ކުރާ ކަމަށް ވެސް ހިޝާން ވަނީ އޭނާގެ ފޭސްބުކް ސްޓޭޓަސްގައި ލިޔެފައެވެ.
ހިޝާން 18 އަހަރު ދުވަސް ވަންދެން ކުރި އިޖުތިމާއީ ހިދުމަތުގައި އެކިގޮތްގޮތުން އެހީތެރިވީ ފަރާތްތަކަށް އޭނާ ވަނީ ޝުކުރުވެސް އަދާ ކޮށްފައެވެ. އަދި އޭނާގެ ހުރިހާ ވެސް ހިތްވަރަކީ އޭނާ އެހީތެރިވީ ނުކުޅެދުންތެރިކަން ހުންނަ ކުދިންގެ އާއިލާތައް ކަމުގައި ވެސް އޭނާ ފާހަގަ ކުރިއެވެ.
ހަމައެހެންމެ ހިޝާން ފެންނަން ނެތް ކަމުގައި ވިޔަސް އޭނާގެ އިޖުތިމާއީ ޚިދުމަތްތައް ފެންނަން ހުންނާނެ ކަމަށް އޭނާ ލިޔެފައިވެއެވެ. އަދި އިޖުތިމާއީ ގޮތުން ކުރެވުނު މަސައްކަތްތަކަށް ދިވެހި ފަސްގަނޑު ހެކިވާނޭ ކަމަށްވެސް އޭނާ ބުންޏެވެ. ބަޔަކު ކޮންމެ ގޮތަކަށް ދުއް ކަމުގައި ވިޔަސް ކުރި ހެޔޮ އަމަލުތައް މާތް ﷲ ދެނެވޮޑިގެންވާނެ ކަމުގައި އޭނާ ފާހަގަ ކުރިއެވެ، އަދި ހަމަ އެހެންމެ އެންމެން ވެސް އުއްމީދު ކުރުމަށާއި ހެޔޮދުއާ ކުރުމަށް އޭނާ ވަނީ އެދިފައެވެ.
ޢައި ލަވް ޔޫ ހިޝާން
ކުރި ހެޔޮ ޢަމަލް އެކަންޏެއް ނޫން ކޮށްފައިވާ ހުރިހައި ނުބައިކަމެއްވެސް ﷲ ދެނެވޮޑިގެންވާނެ. އަދި ޢަމަލް ކީއްކުރަން އެމީހެއްގެ ނިޔަތްވެސް މާތް ﷲ ދެކެދެނެވޮޑިގެންވޭ.