މިދިޔަ މަހު 610 މީހުންނަށް ޑެންގޫ ޖެހިގެން ރިޕޯޓްކުރި
މިދިޔަ މޭ މަހު ޑެންގޫ ޖެހުނު އަދަދު އިތުރުވެ، 610 ޑެންގޫއަށް ޕޮސިޓިވް ވެފައިވާ ކަމަށް ހެލްތު ޕޮރޮޓެކްޝަން އެޖެންސީ (އެޗްޕީއޭ) އިން މިއަދު އާންމުކުރި ތަފާސް ހިސާބުތަކުން ދައްކައިފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާ ގޮތުގައި އެޕްރީލް މަހާ އަޅައިބަލާއިރު މޭ މަހު ޑެންގޫ ހުން ޖެހިގެން ރިޕޯޓްކޮށްފައިވާ އަދަދު ވަނީ އިތުރުވެފައެވެ. އަދި ރިޕޯޓް ކުރެވޭ ހުރިހާ ބައްޔެއް ވެސް އެޕްރީލް މަހާއި އަޅާބަލާއިރު މޭ މަހު އިތުރުވެފައިވާ ކަމަށް އެޗްޕީއޭއިން ބުނެފައިވެއެވެ.
އެގޮތުން، މިދިޔަ މަހު އެކަނިވެސް އަރިދަފުސް ރޯގާގެ 21،720 ކޭސް ރިޕޯޓް ކޮށްފައިވެއެވެ. އަދި ބޭރަށް ހިންގުމާއި ހޮޑުލުމުގެ 2،923 ކޭހާއި، ވައިރަލް ހުމުގެ 12،352 ކޭސް ރިޕޯޓް ކޮށްފައިވެއެވެ.
އެޗްޕީއޭއިން ބުނީ، ޑެންގޫ ހުން އިތުރުވެފައިވަނީ މާލެ ސަރަހައްދުގެ އިތުރުން ކ، ހއ އަދި ބ އަތޮޅުގައި ކަމަށެވެ. މީގެއިތުރުން ވައިރަލް ހުން އިތުރުވެފައިވަނީ މާލެ ސަރަހައްދުގެ އިތުރުން ކ އަދި ބ އަތޮޅުގައި ކަމަށް ވެސް އެޗްޕީއޭއިން ބުނެފައިވެއެވެ.
އިތުރަށް އެޗްޕީއޭއިން ބުނީ ބޭރަށް ހިންގުން ވެސް އެޕްރީލް މަހާއި އަޅާބަލާއިރު، މޭ މަހު އިތުރުވެފައިވާ ކަމަށެވެ. އެގޮތުން އެ ބަލި އިތުރުވެފައިވަނީ މާލެ ސަރަހައްދުގެ އިތުރުން ކ އަތޮޅާއި ފުވައްމުލަށް ސިޓީގައި ކަމަށް އެޗްޕީއޭއިން ބުނެފައިވެއެވެ.
ޑެންގޫ ހުން ފަދަ މަދިރީގެ ޒަރީއާއިން ބަލިތައް ފެތުރޭ މިންވަރު އިތުރުވަމުންދާތީ، ބަލި ފެތުރުން ކޮންޓްރޯލްކޮށް، ބަލިތަކުން ރައްކާތެރިވުމަށް ސަމާލުކަން ދިނުމަށް އެޗްޕީއޭއިން އަންނަނީ ތަކުރާރުކޮށް އިލްތިމާސް ކުރަމުންނެވެ.
