މާލޭގައި އެއްގަމު އުޅަނދު އިތުރުވާތީ އެސެސްމެންޓެއް ހަދަނީ
މާލޭ ސިޓީގައި އެއްގަމު އުޅަނދު އިތުރުވުމުގެ މައްސަލައަށް ހައްލު ހޯދުމުގެ ގޮތުން އެކަމާއި ބެހޭ އެސެސްމެންޓެއް ހަދަން ނިންމައިފި އެވެ.
މާލެ ސިޓީ ކައުންސިލުން ބުނި ގޮތުގައި މި އެސެސްމެންޓު ހަދަނީ އެއްގަމު އުޅަނދު ރަޖިސްޓްރީ ކޮށްދޭނެ އަދަދާއި، އުޅަނދު ބޭނުން ކުރެވޭނެ މުއްދަތު ކަނޑައެޅުމަށްޓަކައި ސާވޭ ކުރުމަށެވެ.
ކައުންސިލުން މިހާރު ވަނީ އެސެސްމެންޓް ހަދާދާނެ ފަރާތެއް ހޯދަން އިއުލާން ކޮށްފަ އެވެ. މިކަމަށް ޝައުގުވެރިވާ ފަރާތްތަކުން މިމަހުގެ 18 ވަނަ ދުވަހުގެ މެންދުރު 13:00 ގެ ކުރިން މާލޭ ސިޓީ ކައުންސިލްގެ އެޑްމިން ސެކްޝަންގެ މީޓިން ރޫމަށް ވަޑައިގެން އަގު ހުށަހެޅުމަށް ސިޓީ ކައުންސިލުން ވަނީ ހުޅުވާލައިފަ އެވެ.
ބިޑް ޕްރޮޕޯސަލް ހުށަހަޅަންވާނީ ބަންދު ކުރެވިފައިވާ ސިޓީ އުރައެއްގައި ހުށަހެޅި ފަރާތުގެ ނަމާއި، އިއުލާން ނަންބަރު އެނގޭނެހެން ބަޔާން ކުރުމަށްފަހު ކަމަށް ސިޓީ ކައުންސިލްގެ އިއުލާނުގައި ވަނީ ބުނެފަ އެވެ.
މާލެ ތޮއްޖެހުމުގެ މައްސަލައަށް ހައްލު ހޯދުމަށް ސިޓީ ކައުންސިލުން މަސައްކަތް ކުރަމުން ދާއިރު ސަރުކާރުންވެސް އަންނަނީ މަސައްކަތްތަކެއް ކުރަމުންނެވެ.
އެގޮތުން މާލޭ ސަރަހައްދުގެ ގެދޮރުގެ މައްސަލަ ހައްލު ކުރުމަށް ރަސްމާލެ ހިއްކުމުގެ އިތުރުން ހުޅުމާލެ، ގުޅީފަޅު އަދި ގިރާވަރު ފަޅު ތަރައްގީ ކުރުމަށްވެސް ސަރުކާރުން ވަނީ ނިންމައިފަ އެވެ.
