އެލައިޑުން އޮންލައިންކޮށް ޕޮލިސީ ގަނެގެން ހަދިޔާއެއް
އެލައިޑް އިންޝުއަރެންސްއަށް 39 އަހަރު ފުރުން ފާހަގަ ކުރުމަށް ކަސްޓަމަރުންނަށް ހަދިޔާ ލިބޭ ހާއްސަ ގިވްއަވޭއަކާ އެކު އަހަރީ ދުވަހާ ގުޅުވައިގެން އިތުރު ހަރަކާތްތަކެއް ފަށައިފިއެވެ.
މި ސީރީޒްގެ ދަށުން އޮންލައިންކޮށް ޕޮލިސީ ގަންނަ ކޮންމެ ކަސްޓަމަރަކަށް ވެސް ހާއްސަ ހަދިޔާއެއް ދިނުމަށް ވަނީ ނިންމައިފަ އެވެ. މި ހަދިޔާ، ޕޮލިސީ ގަންނަތާ 30 ދުވަހުގެ ތެރޭ އެލައިޑް އޮފީހަށް ދިއުމުން ލިބޭނެ އެވެ.
އެލައިޑުން ގިވްއަވޭ ސީރީޒްގައި ހިމެނެނީ އާއްމު ދިރިއުޅުމާއި އޮފީހުގައި ބޭނުންކުރެވޭނެ މުހިންމު ހަދިޔާތަކެވެ. އޭގެ ތެރޭގައި ކުޑަ، ކޯޓު، ތޮފި، ރީޔޫޒަބަލް ކޮތަޅު، ނޯޓްބުކް، ޕެންސިލް ސެޓް، އެގްޒެކެޓިވް ބޮކްސް އަދި ފޯން ސްޓޭންޑު ފަދަ ހަދިޔާތައް ހިމެނެ އެވެ.
އެލައިޑުގެ ގިވްއަވޭ ސީރީޒްގެ އިތުރުން އެ ކުންފުންޏަށް 39 އަހަރު ފުރުން ފާހަގަކުރުމަށް މިއަދުން ފެށިގެން، ޕޮލިސީ ގަންނަ 39 ކަސްޓަމަރުން ހަމަވަންދެން ޕޮލިސީ ގަންނަ ކޮންމެ ކަސްޓަމަރަކަށް ވެސް ހާއްސަ ހަދިޔާއެއް ދިނުމަށް ވަނީ ހަމަޖެހިފަ އެވެ. އަދި އެލައިޑުން އަހަރީ ދުވަސް ފާހަގަކުރުމަށް މި އަހަރު ވެސް ކަޕްކޭކު ބަހަން ވަނީ ހަމަޖެހިފަ އެވެ.
އެލައިޑުގެ އަހަރީ ދުވަސް ފާހަގަކުރުމުގެ ގޮތުން، ފާއިތުވި އަހަރުގެ އެންމެ ރަނގަޅު ތިން ބްރޯކަރުންނާއި ތިން އެޖެންޓުންނަށް އެވޯޑު ވެސް ވަނީ ދީފަ އެވެ. އަދި އެ ކުންފުނީގެ ސީއެސްއާރުގެ ދަށުން ފުލުހުންގެ ރައްކާ ޕްރޮގުރާމާއި މޯލްޑިވްސް ރެޑްކްރެސެންޓުގެ ކޯޕަރޭޓް ހިއުމެނިޓޭރިއަން އިނީޝިއޭޓިވްގައި ބައިވެރިވެ އެއްބަސްވުމުގައި ވަނީ ސޮއިކޮށްފަ އެވެ.
