ދަރިވަރުންގެ ޕޭމަންޓްތައް ލަސްވުމަކީ މިއަދަކު އެކަނިވިކަމެއް ނޫން: މިނިސްޓްރީ
ސަރުކާރުގެ އެހީގައި ރާއްޖެއާއި ރާއްޖެއިން ބޭރުގައި ކިޔަވާ ކުދިންގެ ޕޭމަންޓު ލަސްވުމަކީ މިއަދަކު އެކަނިވެގެން އުޅޭ ކަމެއް ނޫން ކަމަށް ހަޔާ އެޑިއުކޭޝަން މިނިސްޓްރީން މިއަދު ބުނެފި އެވެ.
ސަރުކާރު ހަރަދުގައި ބޭރު ގައުމުތަކުގައި ސްކޮލާޝިޕާއި، ސްޓޫޑެންޓް ލޯނުގައި ކިޔަވާ ދަރިވަރުންގެ ކޯސް ފީ އާއި ސްޓައިޕްއެންޑް ޖަމާނުވާ ކަމަށް ބައެއް ދަރިވަރުން ދަނީ ބުނަމުންނެވެ. އެ މައްސަލާގައި އިދިކޮޅު މައިޕާޓީ އެމްޑީޕީން މިއަދު ކުރިއަށް ދިޔަ ރައްޔިތުންގެ މަޖިލީހަށް ކުއްލި މައްސަލައެއްވެސް ހުށަހެޅި އެވެ. ސަރުކާރުގެ ސުޕަ މެޖޯރިޓީ އޮންނަ މަޖިލީހުން ވަނީ އެ މައްސަލަ ބޭރުކޮށްލާފަ އެވެ.
ސަރުކާރުން ހިންގާ "ސަރުކާރު" ވެބްސައިޓްގައި ހަޔާ އެޑިއުކޭޝަން މިނިސްޓްރީއާ ހަވާލާދީ އާއްމުކުރި ހަބަރެއްގައި ބުނީ ސަރުކާރުން އެހީ ފޯރުކޮށްދީގެން، ރާއްޖެ އާއި ރާއްޖޭން ބޭރުގައި 2163 ދަރިވަރަކު މިވަގުތު ކިޔަވަމުންދާ ކަމަށެވެ.
އެ ދަރިވަރުންގެ ކޯސްފީއާއި ލިވިން އެލަވެންސާއި އެހެނިހެން ހަރަދުތައް ހަމަޖެހިފައިވާ އުސޫލުން، ކަނޑައެޅިފައިވާ މުއްދަތައް ބަރާބަރަށް، ދެއްކުމަކީ މިނިސްޓްރީން އަބަދުވެސް ކުރަމުން އަންނަ ކަމެއް ކަމަށާއި، ނަމަވެސް ބައެއްފަހަރު ބައެއް ޕޭމަންޓްތައް ޖަމާވުމުގައި ލަސްތަކެއްވާ ކަމަށް ގަބޫލުކުރާ ކަމަށެވެ.
"އެއީ މިއަދަކު އެކަނިވިކަމެއް ނޫނެއެވެ. މީގެ ކުރިން ވެސް މިފަދަ ހާލަތްތައް މެދުވެރިވެފައި އެބަހުއްޓެވެ. ޢާއްމުކޮށް ޕޭމަންޓްތައް ލަސްވުމުގައި ދިމާވާ މައިގަނޑު ސަބަބަކީ ކަނޑައެޅިފައިވާ ވަގުތަށް، މި މިނިސްޓްރީއަށް ލިބެންޖެހޭ ލިޔެކިއުންތައް ލަހުން ލިބުމާއި ދަރިވަރު ކިޔަވަމުން ދާކަން، ޔުނިވާސިޓީން ނުވަތަ ކޮލެޖުން ކަށަވަރު ކުރުމުގައި ނަގާ ވަގުތެވެ"
މިނިސްޓްރީން ބުނީ މަސައްކަތް ކުރަމުން މިދަނީ ދަރިވަރުންނަށް ފޯރުކޮށްދޭން ޖެހޭ އެފަދަ ހިދުމަތްތަށް އޮޓެމޭޓްކޮށް، ކުދިން ކިޔަވަމުންދާކަން ވެރިފައިކުރަން އޮންނަ ޕްރޮސެސް، މިއަށްވުރެ ހަލުވިކޮށް، އެކުދިންނަށް ދެވޭ ހިދުމަތުގެ އެފިޝެންސީ އިތުރުކުރެވޭނެ ގޮތްތަށް ހޯދުން ކަމަށެވެ.
ރާއްޖެއާއި ރާއްޖެއިން ބޭރުގައި ކިޔަވަމުންދާ އެންމެހައި ދަރިވަރުންނަށް، ދޭންއޮތް ޔަގީންކަމަކީ އެއްވެސް ދަރިވަރެއްގެ ކިޔެވުމަށް ބުރޫއަރާފަދަ ކަމެއް މެދިވެރިވިޔަ ނުދިމުނަށް، ކުރެވެންއޮތް ކޮންމެކަމެއް ސަރުކާރުން ކުރާނެ ކަމަށް ބުންޏެވެ.
Ads by STO
