މާލެ ނޫން ތަނެއްގައި ބިދޭސީންގެ އެކޮމޮޑޭޝަން އަޅަން ދިވެހިންނަށް ހުޅުވައިލެވިދާނެ: މިނިސްޓަރު
ރާއްޖޭގައި މަސައްކަތްކުރާ ބިދޭސީ މަސައްކަތްތެރިންނަށް އެކޮމޮޑޭޝަން އެޅުމުގެ ފުރުސަތު ދިވެހިންނަށް ހުޅުވާލުމުގެ ފުރުސަތު އެބައޮތް ކަމަށް ހޯމްލޭންޑް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ހޯމްލޭންޑް މިނިސްޓްރީން މިދިޔަ އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި އިހުސާން ވިދާޅުވެފައި ވަނީ ރާއްޖޭގައި ދިރިއުޅޭ ބިދޭސީ މަސައްކަތްތެރިން ބައިތިއްބަން އެކޮމޮޑޭޝަން ބްލޮކުތަކެއް އެޅުމުގެ ޕްރޮޕޯޒަލްއެއް ސަރުކާރަށް ލިބިފައިވާ ކަމަށެވެ. އެ ހުށަހެޅުން ހުށަހަޅާފައި ވަނީ މެލޭޝިޔާގެ ކުންފުންޏެއް ކަމަށްވާ އަޓައިލްޒްއިން ކަމަށް އިހުސާން ވިދާޅުވި އެވެ. އެ ހުށައެޅުމަކީ އަންސޮލިސިޑެޓް ނުވަތަ އެ ކުންފުނިން އިސްނަގައިގެން ހުށަހެޅި ޕްރޮޕޯޒަލެއް ކަމަށް އޭނާ ފާހަގަކުރެއްވި އެވެ.
ރާއްޖެޓީވީގެ "ފަށާއިރު" ޕްރޮގްރާމުގައި، ބިދޭސީންނަށް އެކޮމޮޑޭޝަން އެޅުމަށް ދިވެހި ކުންފުނިތަކަށް ދިނުމާއި ގުޅޭ ގޮތުން ވަނީ ސުވާލުކޮށްފަ އެވެ.
އޭގެ ޖަވާބުގައި މިނިސްޓަރު ވިދާޅުވީ އެކޮމޮޑޭޝަން އަޅަން ދިވެހި ކުންފުނިތަކަށް ދިނުންވެސް އެކަށީގެންވާ ކަމަށެވެ. އެކަމަކު އަދި މިހާތަނަށް ގޮތެއް ނިންމާފައެއް ނުވެ އެވެ.
"އަޅުގަނޑުމެން ފަހަރެއްގައި ރެސްޓްރިކްޓް ކޮށްފާނެ ހަމައެކަނި ސެންޓްރަލް މާލެ އޭރިއާ ހަމައެކަނި އެ ބޭފުޅުންނަށް (މެލޭޝިޔާގެ ކުންފުނި) އަދި އަޅުގަނޑުމެންނަކަށް ނޭނގެ ކިހިނެއް ކަމެއް މީތި ދާނީކީ. ބާކީ ހުރި އޭރިއާތައް ދިވެހިންނަށް ވެސް ހުޅުވާލެވިދާނެ،" އިހުސާން ވިދާޅުވި އެވެ.
އަޓައިލްޒް ކުންފުނީގެ ޕްރޮޕޯޒަލްގައި ހިމަނާފައިވާ ކަންކަން
- އެ ޕްރޮޖެކްޓުގެ ހުރިހާ ހަރަދެއް ކުރާނީ އެ ކުންފުނިން
- މާލެ ސަރަހައްދުގައި 100،000 މީހުންގެ އެކަމޮޑޭޝަން ބްލޮކުތަކެއް އެޅުމަށް ހުށަހަޅާފައިވޭ؛ އެއީ މާލެ، ހުޅުމާލޭގެ ދެ ފިޔަވަހީގެ އިތުރުން ތިލަފުށީގައި
- އެކޮމޮޑޭޝަން ފީއެއްގެ ގޮތުގައި ކޮންމެ ބިދޭސީއެއްގެ އަތުން ނަގަން ނިންމީ 120 ޑޮލަރު، މިނިސްޓަރު ވިދާޅުވީ މަޝްވަރާތަކަށް ފަހު މިހާރު 100 ޑޮލަރަށް ކުޑަކުރެވިފައިވާ ކަމަށް
- އެތަނުގައި އޭޓީއެމް، ކްލިނިކް، ލޯންޑްރީ، ބަދިގޭގެ އިތުރުން ބޭނުންވާ ހިދުމަތްތައް ފޯރުކޮށްދޭނެ
- އަދި އެތަނުގައި އުޅޭ ބިދޭސީންގެ ހުރިހާ މައުލޫމާތެއް ހިމެނޭ ސޮފްޓްވެއާ ސިސްޓަމެއް ވެސް ސަރުކާރަށް ދޭނެ ކަމަށް ހުށަހެޅި
އެ ޕްރޮޕޯޒަލް އިކޮނޮމިކް މިނިސްޓްރީގެ ދަށުން ހިންގާ އިންވެސްޓް މޯލްޑިވްސް އަށް އިވޭލުއޭޓް ކުރަން ފޮނުވީ މޭ މަހުގެ 13 ގަ އެވެ. އެއަށް ގޮތެއް ނިންމާނީ އިންވެސްޓު މޯލްޑިވްސް އިންނެވެ.
