އެމްޑީޕީން ބުނަނީ ސައީދު އެކަހެރިކޮށްލައިފި ކަމަށް
އިގްތިސާދީ ކަންކަމާ ބެހޭ ވަޒީރު, މުހައްމަދު ސައީދަށް ސަރުކާރުން އިތުބާރު ނުކުރާ ކަމަށާއި, ނިންމުންތައް ނިންމުުގައި އޭނާ ބައިވެރި ނުކުރައްވާ ކަމަށް ވިދާޅުވެ ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލަމެންޓަރީ ލީޑަރު އިބްރާހީމް ނާޒިލް ތުހުމަތު ކުރައްވައިފި އެވެ.
ނާޒިލް މިހެން ވިދާޅުވީ, އެމްޑީޕީގެ ޕާލިމެންޓްރީ ގްރޫޕުން މިއަދު މަޖިލީސް އިދާރާގައި ބޭއްވި ޕްރެސް ބްރީފިންފަ އެވެ.
އޭނާ ވަނީ އެންމެ ފަހުން ސަރުކާރުގެ ތިން ވަޒީރެއް ޗައިނާއަށް ކުރެއްވި ރަސްމީ ދަތުރުގައި އިގްތިސާދީ ވަޒީރު ބައިވެރިނުވުމުން އެކަމާ ސުވާލު އުފައްދާފަ އެވެ. އަދި ވިދާޅުވީ, އިގްތިސާދު ރަނގަޅު ކުރަން, ފައިސާ ހޯދަން ކުރާ ދަތުރުގައި އިގްތިސާދީ ވަޒީރު ބައިވެރިވުން މުހިންމު ކަމަށާއި, އެގޮތަށް އެކަން ނުވީ, ސަރުކާރުގައި ސައީދުގެ ބާރެއް ނެތުމުން ކަމަށް ނާޒިލް ވިދާޅުވި އެވެ.
"އިކޮނޮމިކް މިނިސްޓްރާ ދެކޭ ގޮތް ބަދަލުވެއްޖޭ ވާހަކަ ވެސް އަޑުއިވޭ, އިތުބާރެއް ނުކުރައްވާ މިހާރަކު, މިއީ އަޅުނޑުމެންނަށް އިވޭ އާ ވާހަކައެއް މިހާރު" ނާޒިލް ވިދާޅުވި އެވެ.
މި ހަފްތާގައި މާލީ ވަޒީރާއި ދާހިލީ ވަޒީރާއި އިމާރާތް ކުރުމާ ބެހޭ ވަޒީރު ވަނީ ޗައިނާއަށް ވަޑައިގެންފައެވެ. މި ދަތުރުފުޅުގައި ޗައިނާއާއެކު މާލޭގެ މަގު ހެދުމާ ގުޅޭ އެއްބަސްވުމެއްގައި ވަނީ ސޮއިކޮށްފަ އެވެ. އަދި ޗައިނާގެ ދާހިލީ ވުޒާރާއާއި ބައެއް ބޭންކްތަކާއެކު ރާއްޖެއިން ވަނީ މަޝްވަރާކޮށްފަ އެވެ.
