މިނިވަންކަން ހޯދީ ގުރުބާނީތަކެއް ވެގެން، ދަމަހައްޓަން މަސައްކަތްކޮށްދެއްވާ: ވަޒީރު އިޙުސާން
ދިވެހިންގެ މިނިވަންކަން ރައްކާތެރިކޮށްފައިވަނީ ގުރުބާނީތަކެއް ވެގެން ކަމަށާއި އެ މިނިވަންކަން ދެމެހެއްޓުމަށް ހުރިހާ ދިވެހި ރައްޔިތުންވެސް މަސައްކަތް ކުރުމަށް ދާހިލީ ވަޒީރު އަލީ އިޙްސާން ވިދާޅުވެއްޖެ އެވެ.
މިއަދު ފާހަގަކުރަމުންދާ ރާއްޖޭގެ ނަވަވަންނަ މިނިވަން ދުވަހުގެ ތަހުނިޔާ އަރިސްކުރުމަށް ފޮނުއްވި ވީޑިއޯ މެސެޖުގައި ވަޒީރު އިޙުސާން ވިދާޅުވީ މިނިވަންކަމަކީ ދަމަހައްޓަން އުނދަގޫ ކަމެއް ކަމަށެވެ. ދިވެހިންގެ މިނިވަންކަން އެތަކެއް ފަހަރަކު ގެއްލުނު ކަމަށާއި އެއަށްވުރެއް ގިނަ ފަހަރު މިނިވަންކަން ބިރުވެރިކަމެއްގެ ތެރެއަށް ގޮސްފައިވާކަމަށް އިހުސާން ވިދާޅުވި އެވެ.
"ދިވެހި ރައްޔިތުންތަކެއް ގުރުބާނީތަކެއް ވެގެން އަބަދުވެސް އަޅުގަނޑުމެންގެ މިނިވަންކަން ރައްކާތެރިކޮށްފަވަނީ"
އެއަށްފަހު ދިވެހި އެންމެހާ ރައްޔިތުންގެ ކިބައިން އިޙުސާން އެދިލެއްވީ ދިވެހިންގެ މިނިވަންކަން ތާއަބަދު ދެމެހެއްޓުމަށްޓަކައި އަބަދުވެސް މަސައްކަތް ކޮށްދެއްވުމަށެވެ.
ކުރު މެސެޖު ވަޒީރު ނިންމަވައިލެއްވީ ފަހުރުވެރި މިނިވަން ދުވަހުގެ ތަހުނިޔާ ތަކުރާރުކޮށް އަރިސްކުރައްވަމުންނެވެ.
ރާއްޖޭގެ މިނިވަން ދުވަހުގެ ގޮތުގައި ފާހަގަކުރަނީ އިނގިރޭސީންގެ އަތުން ފުރިހަމަ މިނިވަންކަން ހޯދައި އެއްބަސްވުމުގައި ސޮއިކުރި ދުވަހެވެ.
ކުރީގެ ރައީސް އިބްރާހިމް ނާޞިރުގެ ސަރުކާރުގައި މި އެއްބަސްވުމުގައި ސޮއިކޮށްފައިވަނީ އަވައްޓެރި ސްރީލަންކާގަ އެވެ.
