މުޑުދާރު ތަނެއްގައި ފިހާރަތަކުން ގަންނަ ކާބޯތަކެތި ތައްޔާރުކުރަމުން ދިޔަ ބިދޭސީންތަކެއް އަތުލައިގަނެފި
ވީރާނާވެފައިވާ ގެއެއްގައި ކާތަަކެތި ތައްޔާރުކުރަމުން ދިޔަ ތިން ބިދޭސީއަކު އިމިގްރޭޝަން ބެލުމުގެ ދަށަށް ގެންގޮސްފި އެވެ.
އިމިގްރޭޝަންގެ ބެލުމުގެ ދަށަށް އެ ތިން މީހުން ގެންގޮސްފައިވަނީ ގާނޫނާ ހިލާފަށް ރާއްޖޭގައި އުޅޭ ބިދޭސީއިން ޑީޕޯޓްކުރުމުގެ ހާއްސަ އޮޕަރޭޝަނެއް ހޯމް މިނިސްޓްރީއާ ގުޅިގެން އިމިގްރޭޝަނުން ކުރިއަށް ގެންދާ ދަނޑިވަޅެއްގައި މިއަދު ހެނދުނެވެ.
އެ މީހުން އިމިގްރޭޝަންގެ ބެލުމުގެ ދަށަށް ގެންދިއުމާ ގުޅިގެން އިމިގްރޭޝަނުން ބުނީ ދިރިނޫޅެވޭ ވަރަށް ބާވެ, ވީރާނާވެފައިވާ ގެއެއްގައި ވިޔަފާރިއަށް އެކި ކަހަލަ ކާބޯތަކެތި ތައްޔާރުކުރަމުންދާ މައްސަލައަކާ ބެހޭގޮތުން "އިމިގްރޭޝަން ވޮޗް" އަށް ލިބިފައިވާ ރިޕޯޓަކާ ގުޅިގެން ކަމަށެވެ.
އިމިގްރޭޝަނުން ބުނީ އެ ރެއިޑުގައި ގިނަ އަދަދަކަށް އާންމުން ފިހާރަތަކުން ގަނެއުޅޭ ކާބޯތަކެތި ފެނިފައިވާތީ އެކަންކަމާބެހޭ އިދާރާތަކުގެ ސަމާލުކަމަށް ގެނެސްފައިވާ ކަމަށެވެ.
އިމިގްރޭޝަނުން އާންމުކުރި ފޮޓޯތަކުން ފެންނަ ގޮތުގައި ތެލުލި ފަތާއި ޖަބުލާނީއާއި ކުދި ގުޅަ އަދި އަތު ޖެހި ފަދަ ތަކެތި އެތަނުގައި ހުއްޓެވެ.
