ހިންދުސްތާނުގެ "ނޭބަރހުޑް ފަސްޓް" ސިޔާސަތު: ދެކުނު އޭޝިޔާގެ ގުޅުންތައް ބަދަހިކުރުމަށް މުހިންމު
އިންޑިއާގެ ބޮޑުވަޒީރު ނަރެންދްރަ މޯދީގެ ސަރުކާރުން ތަޢާރަފުކޮށްފައިވާ "ނޭބަރހުޑް ފަސްޓް" ސިޔާސަތަކީ ދެކުނު އޭޝިޔާގެ ސަރަޙައްދުގައި އިންޑިއާގެ ނުފޫޒު އިތުރުކޮށް، އަވައްޓެރި ޤައުމުތަކާއެކު އޮންނަ ގުޅުން ބަދަހިކުރުމަށް އަމާޒުކޮށްފައިވާ މުހިންމު ސިޔާސަތެއްކަމަށް ސިޔާސީ ތަޙުލީލުވެރިން ފާހަގަކުރަމުންދެއެވެ.
މި ސިޔާސަތުގެ ދަށުން އިންޑިއާއިން ވަނީ ބަންގްލަދޭޝް، ބޫޓާން، ނޭޕާލް، ސްރީލަންކާ އަދި ދިވެހި ރާއްޖެ ފަދަ އަވައްޓެރި ޤައުމުތަކާއެކު އިޤްތިޞާދީ، ސަޤާފީ އަދި ސިޔާސީ ގުޅުންތައް އިތުރަށް ހަރުދަނާކުރުމަށް ގިނަ މަސައްކަތްތަކެއް ކޮށްފައެވެ. މީގެ ތެރޭގައި ވިޔަފާރީގެ އެއްބަސްވުންތަކާއި، އިންފްރާސްޓްރަކްޗަރ ތަރައްޤީކުރުމުގެ މަޝްރޫޢުތައް، އަދި ސަލާމަތީ އެއްބާރުލުން ހިމެނެއެވެ.
އިންޑިއާގެ ބޮޑުވަޒީރު ނަރެންދްރަ މޯދީ ވިދާޅުވެފައިވަނީ، "އަޅުގަނޑުމެންގެ އަވައްޓެރި ޤައުމުތަކާއެކު އޮންނަ ގުޅުމަކީ އަޅުގަނޑުމެންގެ ޚާރިޖީ ސިޔާސަތުގެ އެންމެ މުހިންމު ބައިކަމުގައި ދެކެމެވެ. މި ސަރަޙައްދުގެ ހުރިހާ ޤައުމުތަކެއްގެ ކުރިއެރުމާއި ތަރައްޤީއަށް މަގުފަހިކުރުމަށްޓަކައި އަޅުގަނޑުމެން އެކުގައި މަސައްކަތްކުރަން ޖެހެއެވެ."
މި ސިޔާސަތުގެ ދަށުން ހިންދުސްތާނުން ވަނީ ސްރީލަންކާގެ އިޤްތިޞާދީ ހާލަތު ރަނގަޅުކުރުމަށް 4 ބިލިއަން ޑޮލަރުގެ އެހީތެރިކަން ފޯރުކޮށްދީފައެވެ. އަދި ބަންގްލަދޭޝްއާއެކު ހަކަތައިގެ ދާއިރާއިން އެއްބާރުލުން އިތުރުކުރުމަށް އެއްބަސްވުމެއްގައި ސޮއިކޮށްފައެވެ. މީގެ އިތުރުން، ނޭޕާލްގައި ބޮޑެތި އިންފްރާސްޓްރަކްޗަރ މަޝްރޫޢުތަކެއް ހިންގުމަށް ވެސް ހިންދުސްތާނުން ވަނީ އެއްބަސްވެފައެވެ.
ދިވެހިރާއްޖެއާ ގުޅޭގޮތުން ބަލާއިރު، ހިންދުސްތާނުން ވަނީ "ނޭބަރހުޑް ފަސްޓް" ސިޔާސަތުގެ ދަށުން ދިވެހިރާއްޖެއަށް ވެސް ގިނަ އެހީތެރިކަމެއް ފޯރުކޮށްދީފައެވެ. މީގެ ތެރޭގައި ވިލިމާލެ ބްރިޖް އެޅުމަށް 100 މިލިއަން ޑޮލަރުގެ ލޯނު އެހީ ދިނުމާއި، ކޮވިޑް-19 ގެ ބަލިމަޑުކަމުގެ ތެރޭގައި ވެކްސިން ފޯރުކޮށްދިނުން ހިމެނެއެވެ. މީގެ އިތުރުން، ދެ ޤައުމުގެ ދެމެދުގައި ވިޔަފާރީގެ ގުޅުން އިތުރަށް ވަރުގަދަކުރުމަށް މަސައްކަތްތަކެއް ކުރެވެމުންދެއެވެ.
"ނޭބަރހުޑް ފަސްޓް" ސިޔާސަތުގެ އަނެއް މުހިންމު ސްޓްރެޓެޖީއަކީ ސަރަޙައްދީ ގުޅުންތައް ހަރުދަނާކުރުމެވެ. މިގޮތުން، ސާރކް (ސައުތު އޭޝިއަން އެސޯސިއޭޝަން ފޮރ ރީޖަނަލް ކޯޕަރޭޝަން) އަދި ބިމްސްޓެކް (ބޭ އޮފް ބެންގޯލް އިނީޝިއޭޓިވް ފޮރ މަލްޓި-ސެކްޓޯރަލް ޓެކްނިކަލް އެންޑް އިކޮނޮމިކް ކޯޕަރޭޝަން) ފަދަ ސަރަޙައްދީ ޖަމްޢިއްޔާތަކުގައި ހިންދުސްތާނުގެ ދައުރު އިތުރުކުރުމަށް މަސައްކަތްކުރަމުންދެއެވެ.
އެހެންނަމަވެސް، މި ސިޔާސަތަށް ފާޑުކިޔާ ފަރާތްތަކުން ބުނާގޮތުގައި ހިންދުސްތާނުގެ މި ސިޔާސަތަކީ ޗައިނާގެ "ބެލްޓް އެންޑް ރޯޑް އިނީޝިއޭޓިވް" އާ ވާދަކުރުމަށް އެކުލަވާލާފައިވާ ސިޔާސަތެކެވެ. އަދި މި ސިޔާސަތުގެ ސަބަބުން ކުދި ޤައުމުތަކުގެ މިނިވަންކަމަށް އަސަރުކޮށްފާނެކަމަށް ބައެއް ފަރާތްތަކުން ކަންބޮޑުވުން ފާޅުކުރެއެވެ.
ނަމަވެސް، ހިންދުސްތާނުގެ ސަރުކާރުން ދެކޭގޮތުގައި "ނޭބަރހުޑް ފަސްޓް" ސިޔާސަތަކީ ހުރިހާ ޤައުމުތަކެއްގެ މަޞްލަޙަތު ހިމާޔަތްކުރެވޭނެ ގޮތަށް އެކުލަވާލާފައިވާ ސިޔާސަތެކެވެ. ހިންދުސްތާނުގެ ޚާރިޖީ ވަޒީރު ޑރ. އެސް. ޖައިޝަންކަރ ވިދާޅުވެފައިވަނީ، "އަޅުގަނޑުމެންގެ މަޤްޞަދަކީ މި ސަރަޙައްދުގެ ހުރިހާ ޤައުމުތަކެއްގެ ކުރިއެރުމާއި ތަރައްޤީއަށް މަގުފަހިކުރުމެވެ. އަޅުގަނޑުމެން ގަބޫލުކުރަނީ މި ސަރަޙައްދުގެ ހުރިހާ ޤައުމުތަކެއް އެކުގައި ކުރިއަރައިގެން ނޫނީ އަޅުގަނޑުމެންނަށް ދެމެހެއްޓެނިވި ތަރައްޤީއެއް ހާސިލެއް ނުކުރެވޭނެކަމަށެވެ."
"ނޭބަރހުޑް ފަސްޓް" ސިޔާސަތުގެ އަނެއް މުހިންމު ބައެއްގެ ގޮތުގައި ފާހަގަކުރެވެނީ ސަޤާފީ ގުޅުންތައް ބަދަހިކުރުމެވެ. މިގޮތުން، ހިންދުސްތާނުން ވަނީ އަވައްޓެރި ޤައުމުތަކާއެކު ތަފާތު ސަޤާފީ ޕްރޮގްރާމްތައް ހިންގައި، ތަޢުލީމީ ދާއިރާއިން އެއްބާރުލުން އިތުރުކޮށްފައެވެ. މިސާލަކަށް، ހިންދުސްތާނުގެ ސަރުކާރުން ވަނީ އަވައްޓެރި ޤައުމުތަކުގެ ދަރިވަރުންނަށް ސްކޮލަރޝިޕް ޕްރޮގްރާމްތައް ތަޢާރަފުކޮށް، ހިންދުސްތާނުގެ މަތީ ތަޢުލީމުގެ ފުރުޞަތުތައް ފަހިކޮށްދީފައެވެ.
މި ސިޔާސަތުގެ އަނެއް މުހިންމު ދާއިރާއަކީ ޓެރަރިޒަމާ ދެކޮޅަށް ކުރެވޭ މަސައްކަތްތަކެވެ. ހިންދުސްތާނުން ވަނީ އަވައްޓެރި ޤައުމުތަކާއެކު ޓެރަރިޒަމާ ދެކޮޅަށް މަޢުލޫމާތު ޙިއްޞާކުރުމާއި، އިންޓެލިޖެންސް އެއްބާރުލުން އިތުރުކުރުމަށް އެއްބަސްވުންތަކެއްގައި ސޮއިކޮށްފައެވެ. މިކަމުގެ ސަބަބުން މުޅި ސަރަޙައްދުގެ ސަލާމަތާއި ރައްކާތެރިކަން އިތުރުވެގެންދާނެކަމަށް ބެލެވެއެވެ.
އެހެންނަމަވެސް، "ނޭބަރހުޑް ފަސްޓް" ސިޔާސަތު ތަންފީޒުކުރުމުގައި ބައެއް ގޮންޖެހުންތަކާ ކުރިމަތިވެފައިވެއެވެ. މިގޮތުން، ޕާކިސްތާނާއެކު އޮންނަ ގުޅުމުގައި ދަތިތަކެއް ހުރިކަން ފާހަގަކުރެވެއެވެ. ދެ ޤައުމުގެ ދެމެދުގައި އޮންނަ ސަރަޙައްދީ ވާދަވެރިކަމާއި، ކަޝްމީރުގެ މައްސަލައަކީ މި ސިޔާސަތު ފުރިހަމައަށް ތަންފީޒުކުރުމަށް ހުރި ބޮޑު ހުރަހެކެވެ.
އެޑިޓަރުގެ ނޯޓް: މިއީ އިންޑިއާގެ މިނިވަން ދުވަހާ ދިމާކޮށް, ރާއްޖޭގައި ހުންނަ އިންޑިއާ އެންބަސީން ވިޔަފާރި އުސޫލުން މި ނޫހުގައި ޝާއިރުކޮށްފައިވާ ލިޔުމެކެވެ.
