އިންޑިއާގައި ޕަބްޖީ ކަފުންކޮށް ވަޅުލައިފި
އިންޑިއާގެ ގިނަ ބަޔަކު ކުޅެމުންދިޔަ މަގުބޫލު ގޭމް ޕަބްޖީ އެގައުމުގައި ކުޅުން މަނާ ކުރީ މިދިޔަ ބުދަ ދުވަހުއެވެ. އެދުވަހު އެ ގޭމްގެ އިތުރުން ޗައިނާގެ އިތުުރު 117 އެޕްލިކޭޝަނެއް ވެސް ވަނީ އިންޑިއާގައި ބޭނުން ނުކުރެވޭ ގޮތް ހަދާފައެވެ.
ބޭރުގެ މީޑިއާތައް ބުނާ ގޮތުން އިންޑިއާގައި ޕަބްޖީ ކުޅުން މަނާ ކުރި ފަހުން "ޕަބްޖީ"ގެ އުފެއްދި ކުންފުންޏަށް ވަނީ ބޮޑު ގެއްލުމަކާ ކުރިމަތިލާން ޖެހިފައެވެ. އެގޮތުން ގާތްގަނޑަކަށް 34 އެމެރިކަން ޑޮލަރުގެ ގެއްލުމެއް މި ކުންފުންޏަށް ލިބިފައިވާ ކަމަށް އިންޑިއާގެ ނޫހެއް ކަމަށްވާ "ޓައިމްސް އޮފް އިންޑިއާ" އިން ހާމަ ކުރެއެވެ.
ޕަބްޖީ ކުޅުން އިންޑިއާގައި މަނާ ކުރުމުގެ ސަބަބުން އިންޑިއާގައި މިހާރު އެހެން ގޭމެއް ތައާރަފް ކޮށްގެން އުޅޭ ކަމުގެ ޚަބަރުތައް ވެސް ބޭރުގެ މީޑިއާތަކުން ބުނެއެވެ. އަދި ޕަބްޖީ ކުޅުން މަނާ ކުރުމުގެ ސަބަބުން ހަމަ އެ ގޭމާއި އެއްގޮތް "ކޯލް އޮފް ޑިއުޓީ" ގިނަ ބަޔަކު ކުޅެން ފަށައިފައިވާ ކަމަށްވެސް ބައެއް މީޑިއާތަކުން ރިޕޯޓް ކުރިއެވެ.
ޕަބްޖީ ކުޅުން އިންޑިއާގައި މަނާ ކުރުމުގެ ސަަބަބުން ގިނަ ބަޔަކު ވަނީ އެކަމާ ނުރުހުން ފާޅު ކޮށްފައެވެ. އަދި ހަމަ އެހެންމެ އެެކަމާ ގިނަ ބަޔަކު މީސްމީޑިއާގައި ހިތާމަ ފާޅު ކޮށްފައި ވެއެވެ.
އިންޑިއާގެ އޮންލައިން ނޫހެއް ކަމަށްވާ އިންޑިއާ ޓައިމްސްގެ ފޭސްބުކް ޕޭޖުގައި މިއަދު ހިއްސާކޮށްފައިވާ ވީޑިއޯއެއްގައި ދައްކުވައިދެނީ އިންޑިއާގައި ޕަބްޖީ ކުޅެ އުޅުނު ޒުވާނުން ތަކެއް ޕަބްޖީގެ ލޯގޯގެ ފޮޓޯގަނޑެއް ޖަހާފައިވާ ސަންދޯކެއް އުފުލާތަނެވެ. އަދި އެއަށްފަހު ބަޔަކު ޕަބްޖީގެ މޫނު ދެކި ތައުޒިޔާ ކިޔާ ތަން ވެސް މި ވީޑިއޯގައި ވަނީ ދައްކައިދީފައެވެ.
މި ވީޑިއޯ އަކީ އިންޑިއާގައި ޕަބްޖީ ކުޅުން މަނާ ކުުރުމުގެ ސަބަބުން މަަޖަލަކަށް އެ ޒުވާނުން ތައްޔާރު ކޮށްފައިވާ ވީޑިއޯއެއް ކަމުގައި ބެލެވެއެވެ.
