ތިނަދޫ އިން ނެގި ހުރިހާ ސާމްޕަލް އެއް ނައްސި
ގދ. ތިނަދޫ އިން ކޮވިޑް-19 ފެތުރިފައިވޭތޯ ބެލުމަށް ނެގި ހުރިހާ ރެންޑަމް ސާމްޕަލް އެއް ނައްސި ވެއްޖެއެވެ.
ތިނަދޫ އިން ނަގާފައިވަނީ ޖުމްލަ 77 ސާމްޕަލް އެވެ. ތިނަދޫ ޑރ. އަބްދުއް ސަމަދު މެމޯރިއަލް ހޮސްޕިޓަލް އިން ހާމަކޮށްފައިވާ ގޮތުގައި މި ހުރިހާ ސާމްޕަލް އެއްގެ ނަތީޖާ ވަނީ ނައްސިވެފައެވެ.
އެރަށުގައި ބަލި ފެތުރޭތޯ ބެލުމަށް ރެންޑަމް ސާމްޕްލިން ނަގާފައިވަނީ އެރަށުން ދެ މީހަކު ފައްސިވުމާ ގުޅިގެންނެވެ.
ތިނަދޫއިން ފައްސި ވެފައިވަނީ އެރަށުގެ މީހަކާއި އެރަށާއި މާލެއާއި ދެމެދު ދަތުރުކުރާ ބޯޓެއްގައި މަސައްކަތްކުރާ ބިދޭސީއެކެވެ.
ތިނަދޫ އިން އެންމެ ފުރަތަމަ ފައްސިވީ އުމުރުން 68 އަހަރުގެ ފިރިހެނެކެވެ. އޭނާ ގއ. ވިލިނގިލީގައި ހުންނަ ކޮވިޑް ފެސިލިޓީއަށް ގެންދަން އުޅުމުން އެރަށުގެ ބަޔަކުވަނީ އެކަމާއި މުޒާހަރާކޮށް، އެމީހާ ވިލިނގިއްޔަށް އެރުވުން ހުއްޓުވާފައެވެ. އެހެންކަމުން އޭނާ ވަނީ ފަރުވާއަށް މާލެ ގެނެސްފައެވެ.
ދެވަނައަށް އެރަށުން ފައްސި ވެފައިވަނީ، ފުރަތަމަ ފައްސިވީ މީހާ ކޮންޓެކްޓްވީ މީހުންގެ ތެރެއިން މީހެކެވެ.
