ކާޑު ލިމިޓަށް ގެނައި ބަދަލާއެކު އެންމެން ބީއެމްއެލްއަށް ގުޅަނީ, ކަސްޓަމާ ކެއާއަށް ބާރުބޮޑުވެއްޖެ
ކާޑު ލިމިޓަށް މިއަދުން ފެށިގެން ގެނައި ބަދަލާ އެކު، ބޭންކް އޮފް މޯލްޑިވްސް (ބީއެމްއެލް) ގެ ކޯލް ސެންޓަރަށް ބާރުބޮޑުވެއްޖެ އެވެ.
ބީއެމްއެލުން ދޫކޮށްފައިވާ ކާޑުތަކުން ރާއްޖޭން ބޭރުގެ މުއާމަލާތް ކުރެވޭ ލިމިޓްތަކަށް މިއަދު ވަނީ ބަދަލު ގެނެސްފަ އެވެ. މި ގެނެވުނު ބަދަލުތަކަށް ވަގުތުން ފެށިގެން އަމަލު ކުރުމަށް ހަމަޖެހިފައިވާ ކަމަށް އެ ބޭންކުން ބުނެ އެވެ. ބޭންކުން މި ބަދަލު ގެނެސްފައި ވަނީ ކާޑުން ކުރެވޭ ބޭރުގެ މުއާމަލާތްތަކުގެ އަދަދު ދުވަހުން ދުވަހަށް އިތުރުވަމުންދިޔަ ނަމަވެސް ބޭންކަށް ގަންނަން ލިބޭ ބޭރު ފައިސާގެ އަދަދު އެއް މިންވަރެއްގައި ހިފެހެއްޓިފައިވާތީ އެވެ.
ބީއެމްއެލްގެ ރަސްމީ "އެކްސް" އެކައުންޓުން ކުރި ޕޯސްޓެއްގައި ބުނީ އެ ބޭންކުގެ ކޯލް ސެންޓަރަށް ބާރުބޮޑުވެފައިވާތީ އެ ސެންޓަރަށް ގުޅުމުގައި ކަސްޓަމަރުންނަށް ދަތިތަކެއް ކުރިމަތިވެދާނެ ކަމަށެވެ.
ބުނީ ގެނައި ބަދަލުތަކާ ގުޅުންހުރި މައުލޫމާތު ބޭންކުގެ ވެބްސައިޓުން ފެންނަން ހުންނާނެ ކަމަށެވެ. ކޯލް ސެންޓަރަށް ގުޅުމަށް ދިމާވާ ދަތިތަކަށް މާފަށް އެދި ބޭންކުން ވަނީ ސޯޝަލް މީޑިއާ ނުވަތަ އިންޓަނެޓް ބޭންކިން އެޕްލިކޭޝަން މެދުވެރިކޮށް ކަސްޓަމާ ކެއާ މުވައްޒަފުންނާ މުއާމަލާތް ކުރެވޭނެ ކަމަށް ބުނެފަ އެވެ.
ކާޑު ލިމިޓުތަކަށް ބޭންކުން ގެނައި ބަދަލުތައް:
- މިހާރު ދޫކޮށްފައިވާ ޑެބިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތްކުރުމަށް އެއްވެސް އަދަދެއް ނުލިބޭނެ.
- މިއަދުން ފެށިގެން އަލަށް ދޫކުރާ ޑެބިޓް އަދި ކްރެޑިޓް ކާޑުތައް: ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާނަމަ ރާއްޖޭން ބޭރުގެ މުއާމަލާތްކުރުމަށް އެއްވެސް އަދަދެއް ނުލިބޭނެ.
- މިހާރު ދޫކޮށްފައިވާ ސްޓޭންޑަރޑް އަދި ގޯލްޑް ކްރެޑިޓް ކާޑުތައް: މަހެއްގެ މައްޗަށް ކުރެވޭ ރާއްޖޭން ބޭރުގެ މުއާމަލާތްތައް 100 ޑޮލަރަށް ދަށްކުރުން.
Ads by STO
