ރާއްޖޭގެ ކަންކަން މިހާރު ހިނގަނީ އިންޑިއާ އެމްބަސީން ބުނާ ގޮތަކަށް: ފަޔާޒް

ރާއްޖޭގެ ކަންކަން މިހާރު ހިނގަމުން ދަނީ އިންޑިއާ އެމްބަސީން ބުނާ ގޮތަކަށް ކަމަށް ރިޓަޔާޑް ކާނަލް އަޙުމަދު ފަޔާޒު ވިދާޅުވެއްޖެއެވެ.

Ads by STELCO

އެމަނިކުފާނު މިހެން ވިދާޅުވެފައިވަނީ އިންޑިއާ ސިފައިން ރާއްޖޭގައި ތިބުމާއި ގުޅޭ ގޮތުން ރޭ ޓީވީގައި ދެއްކެވި ވާހަކަފުޅެއްގައެވެ. އެގޮތުން ބޭރު ގައުމެއްގެ ސިފައިން ގައުމުގައި ތިބުމުގެ ނުރައްކާތެރިކަން އެމަނިކުފާނު ވަނީ ފާހަގަ ކުރައްވާފައެވެ. އެގޮތުން ރާއްޖޭގައި ތިބި އިންޑިޔާ ސިފައިންނަކީ ޑިޕްލޮމެޓިކް އިމިއުނިޓީ ލިބިފައިވާ ބައެއް ކަމަށާއި އެމީހުން ތިބޭ ގެތަކަށް ވެސް ދިވެހި ދައުލަތުގެ ބާރު ނުހިނގާނެ ކަމަށް ފަޔާޒު ފާހަގަ ކުރެއްވިއެވެ. ހަމައެހެންމެ އެމީހުން ގެންނަ ދާގީނާ ފަދަ ތަކެއްޗަކީ ވެސް ޗެކު ކުރެވޭނެ އެއްޗިހި ނޫން ކަމަށް އޭނާ ވިދާޅުވިއެވެ.

މީގެ އިތުރުން އިންޑިއާއިން ރާއްޖޭގައި ބަހައްޓަމުންދާ ރާޑަރުތަކާއި ގުޅިގެން އެމަނިކުފާނު ވިދާޅުވީ ސާކް ސަރަޙައްދުގައި ވެސް އިންޑިއާގެ ރާޑަރުތައް ހުރީ ހަމައެކަނި ދިވެހި ރާއްޖޭގައި ކަމަށާއި އެ ރާޑަރުތަކަކީ ދިވެހީންނަށް ބޭނުން ކުރެވޭ އެއްޗެއް ނޫން ކަމަށެވެ. އަދި އެ ރާޑަރުތައް ބޭނުން ކުރަނީ އެހެން ގައުމުގެ ކަންކަން ބަލަން ކަމަށް ވެސް ފަޔާޒު ވިދާޅުވިއެވެ.

ފަޔާޒު ވިދާޅުވީ ދިވެހިންނާއި އިންޑިއާއި ދެމެދު އެއްވެސް މައްސަލައެއް ނެތް ކަމަށާއި ނަމަވެސް އެއްވެސް ގައުމެއްގެ ސިފައިން މި ގައުމުގައި ތިބުމަކީ ގައުމާ މެދު ބޭރު ދުނިޔެ ދެކޭ ގޮތް ބަދަލުވާނެ ކަމެއް ކަމަށެވެ. ހަމައެހެންމެ ފިނި ހަނގުރާމައެއްގެ ވިލާ ގަނޑެއްގެ ދަށުގައި ދުނިޔެ ވާއިރެއްގައި ރާއްޖެއިން ވަކިކޮޅެއް ނެގުމަކީ އެކަމުގެ ނުރަނގަޅު އަސަރު ކުރާނެ ކަމެއް ކަމަށް ފަޔާޒް ފާހަގަ ކުރެއްވިއެވެ.

ފަޔާޒު ވަނީ އިންޑިއާ ސިފައިން ރާއްޖޭގައި ތިބުމާއި ގުޅިގެން ދިމާވެފައިވާ ބައެއް މައްސަލަތައް ވެސް ހިއްސާކޮށްފައެވެ. އެގޮތުން އިންޑިޔާ ސިފައިންނަށް ޑިޕްލޮމެޓިކް ރައްކާތެރިކަން އޮތުމާއެކު އެމީހުން ދިރިއުޅޭ ތަންތަނަށް ބަނގުރާ ގެންގޮސް އެތަކެތި ޒުވާނުންގެ އަތަށް އަރާފައިވާ މައްސަލައެއް 2010 ވަނަ އަހަރު ހިނގާފައިވާ ކަމަށެވެ. އަދި ލ. އަތޮޅުގައި ތިބި އިންޑިޔާ ސިފައިންނާއި ބައެއް މީހުންގެ އަނބިންނާ ދޭތެރޭ ހިނގި ކަމެއްގައި އެމީހުންގެ ފިރިން ނުކުމެ އިންޑިޔާ ސިފައިންނަށް ހަމަލާދީފައިވާ މައްސަލައެއް ވެސް 2016 ވަނަ އަހަރު ހިނގާފައިވާ ކަމަށް އޭނާ ވިދާޅުވިއެވެ. އެފަހަރު ކައްދޫގައި ތިބި އިންޑިއާ ސިފައިން ގެންދިޔަ ކަމަށް ވެސް ފަޔާޒު ފާހަގަ ކުރެއްވިއެވެ.

އޭނާ އިތުރަށް ވިދާޅުވީ މިފަދަ ކަންކަމަކީ ނުރައްކާތެރި ކަންކަން ކަމުގައެވެ. އެފަދަ ކަންކަން ހިނގުމުން އެއީ ރާއްޖޭގައި ތިބި އިންޑިޔާ ސިފައިންގެ ރައްކާތެރިކަމަށްޓަކައި ހަތިޔާރު ބޭނުންކުރުމާއި ގެންގުޅުން ހުއްދަކުރުމަށް ލިބޭ ޢުޒުރެއް ކަމުގައި އޭނާ ފާހަގަކުރެއްވިއެވެ. އެފަދަ އިޖުތިމާޢީ މައްސަލަތަކުގެ ތެރެއިން އުފެދިގެން އަންނަނީ ވަރަށް ނުރައްކާތެރި ޙާލަތެއް ކަމުގައިވެސް ފަޔާޒް ފާހަގަކުރެއްވިއެވެ.

ފަޔާޒު ވިދާޅުވީ ރާއްޖޭގައި އެއްވެސް ގައުމެއްގެ ސިފައިން ތިބުމަށް ރާއްޖޭގެ ސިފައިންގެ ބޭކަލުން ވެސް ދެކޮޅުވާނެ ކަމަށެވެ.