އެއާޕޯޓުގެ ޑްރައިވަރަކު ކުއްލި ގޮތަކަށް މަރުވެއްޖެ
ވެލާނަ އިންޓަނޭޝަނަލް އެއާޕޯޓުގެ ލަގެޖް އުފުލާ ވެހިކަލެއްގެ ޑްރައިވަރު ޑިއުޓީގައި ހުއްޓާ ކުއްލި ގޮތަކަށް މަރުވެއްޖެ އެވެ.
މަރުވެފައިވަނީ 45 އަހަރުގެ ދިވެހި ފިރިހެނެކެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ، އެއާޕޯޓް ލަގެޖް އުފުލާ ވެހިކަލެއް ދުއްވަމުން ދަނިކޮށް އޭޕްރޯން ގައި ލައިޓްއާ ކެމެރާ ހަރުކޮށްފައިވާ ސްޓްރަކްޗާ އެއްގެ ބުޑުގައި ޖެހިފައިވާ ކަމަށެވެ.
ފުލުހުން ބުނީ ސްޓްރަކްޗާގައި ޖެހުނީ އެ މީހާ އަށް ސިއްހީ ހާލަތެއް މެދުވެރިވެގެން ކަމަށް ބެލެވޭ ކަމަށެވެ.
ވެހިކަލް ދުއްވި މީހާ ކްލިނިކަށް ގެންގޮސް އަދި މިހާރު އައިޖީއެމްއެޗަށް ގެންގޮސްފައިވާ ކަމަށް ފުލުހުންގެ މެސެޖުގައި ބުންޏެވެ.
ފުލުހުން ބުނީ، ވެހިކަލް ދުއްވަން އިން މީހާ ކްލިނިކަށް ގެންދިޔައިރުވެސް މަރުވެފައިވާ ކަމުގެ މައުލޫމާތު ލިބިފައިވާ ކަމަށެވެ.
"އަދި އައިޖީއެމްއެޗަށް ގެންގޮސް އިތުރަށް ބަލައި، ބޭރުފުށުން އެއްވެސް އަނިޔާއެއް ފެންނަން ނެތް ކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވޭ" ފުލުހުންގެ މެސެޖުގައި ބުންޏެވެ.
