ބުޅާމަހުން ކާތަކެތި ތައްޔާރުކުރި ކަމުގެ ހެއްކެއް ނެތް: ފުލުހުން
މާލޭގައި ބުޅާތަކެއް މަރައި، އޭގެ މަހުން ކާ އެއްޗެހި ތައްޔާރުކުރި ކަމަށް ތުހުމަތު ކުރެވޭ އަރަފާތު ހޮސެއިން އެފަދަ ކަމެއް ކުރިކަމަށް ހެކި ފެނިފައިނުވާ ކަމަށް ފުލުހުން ބުނެފި އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން މިފަަދައިން ބުނީ އަރަފާތުގެ މައްޗަށް ޖިނާއީ ތަހުގީގެއް ހިންގޭ ވަރަށް ހެކި ގަރީނާ ލިބިފައިނުވާ ކަމަށެވެ. އަދި އެ މައްސަލާގައި ފުލުހުން ކުރަމުން ދިޔަ ތަހުގީގު ނިންމާލާފައިވާ ކަމަށް ފުލުހުން ބުނެ އެވެ.
ފުލުހުން ބުނީ އަރަފާތު އިމިގްރޭޝަން އާ ހަވާލުކުރުމުން ޑީޕޯޓްކޮށްލާފައިވާ ކަމަށެވެ.
ގ. ރަނައުރާގެއާގޭގެ 8 ފޫޓާއި 10 ފޫޓުގެ ކޮޓަރިއެއް ކުއްޔަށް ހިފައިގެން އުޅޭ އަރަފާތު ބުޅާ މަހުން ކާތަކެތި ތައްޔާރުކުރާ ކަމަށް ބުނާ މައްސަލަ އިދާރާތުގެ ސަމާލުކަމަށް އެންމެ ފުރަތަމަ ގެނައީ ފެލިން ވެލްފެއާ އޯގަނައިޒޭޝަން ކިޔާ އެންޖީއޯ އަކުންނެވެ. އެއީ މިދިޔަ އޮގަސްޓް މަހުގެ 19 ވަނަ ދުވަހު އެވެ.
ޖެހިގެން އައި ދުވަހު ފުލުހުން އޭނާ ހައްޔަރުކުރީ ސެލޫނެއްގައި ހުއްޓަ އެވެ.
އިމިގްރޭޝަނުން ވަނީ ގަވާއިދާ ހިލާފަށް އުޅޭ ބިދޭސީން އާންމު ރައްކާތެރި ކަމަށް ބެލުމެއް ނެތި ދިރިއުޅެމުން އަންނަ ތަންތަން ބަލައި ފާސްކުރުމުގެ ހާއްސަ އޮޕަރޭޝަނެއް ވެސް ފަށާފަ އެވެ.
އެ އޮޕަރޭޝަނުގެ ތެރެއިން ގަވާއިދާ ހިލާފަށް ރާއްޖޭގައި އުޅޭ ބިދޭސީން ދިރިއުޅޭ ތަންތަނާ މިފަދަ ފަރާތްތަކުން އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަށް ކާބޯތަކެތި ތައްޔާރުކުރާ ތަންތަަން ބަލައި ފާސްކުރުމުގެ މަސައްކަތް ކުރާނެ އެވެ.
Ads by STO
